ថ្នាំពន្យារជីវិតជាអ្វី?
បើទោះបីជាបច្ចុប្បន្ននេះ
នៅប្រទេសកម្ពុជាអាចផលិតថ្នាំពន្យារជីវិតអ្នកកើតជម្ងឺអេដស៍ឬថ្នាំ
ប្រឆាំងនឹងមេរោគអេដស៍បានក៏ដោយ
ក៏មិនមែនមានន័យថាកម្ពុជាអាចជួយសង្គ្រោះអ្នកមានជម្ងឺអេដស៍ទាំងអស់
បាននោះដែរទេ។ ថ្នាំពន្យារជីវិតនេះ
គឺជាប្រភេទថ្នាំម្យ៉ាងដែលអាចជួយជំរុញឱ្យសារធាតុគ្រាប់ឈាមសេដេកាត់ឌ៤
នៅក្នុងគ្រាប់ឈាមសរបស់អ្នកជម្ងឺកើនឡើងវិញ
ខណៈដែលមេរោគអេដស៍នេះបានទៅបំផ្លាញសារធាតុសេឌឺកាត់របស់អ្នកជម្ងឺឱ្យ
ចុះថយ ឬអាចនិយាយបានថាគឺជាថ្នាំសម្រាប់ទប់ស្កាត់
មេរោគអេដស៍កុំឱ្យរីកដុះដាល ឬកកើតកូនចៅបន្ថែមទៀត។
ហេតុអ្វីបានជាកម្ពុជាផលិតថ្នាំពន្យារជីវិតដោយខ្លួនឯង?
វាជារឿងធម្មតាទេដែលប្រទេសនានាមិនមានសិទ្ធិផលិតថ្នាំប្រភេទថ្មីៗ
ដែលអ្នកស្រាវជ្រាវនៅប្រទេសអភិវឌ្ឍន៍ទើបតែធ្វើការស្រាវជ្រាវរកឃើញ
នោះ។
ដោយឡែកដោយសារតែមានការប្រកាសអនុញ្ញាតជាផ្លូវការរបស់អង្គការ
ពាណិជ្ជកម្មពិភពលោក (WTO)នៅទីក្រុងដូហាប្រទេសកាតានៅចុងឆ្នាំ២០០១
បានអនុញ្ញាតឱ្យប្រទេសក្រីក្រ
ជាពិសេសប្រទេសកំពុងអភិវឌ្ឍន៍មានសិទ្ធិផលិតថ្នាំប្រឆាំងមេរោគអេដស៍
(ARV) ឬថ្នាំពន្យារជីវិតនៅប្រទេសរបស់ខ្លួនបានដោយស្របច្បាប់។
មូលហេតុសំខាន់ដែលជំរុញឱ្យមានការផលិតថ្នាំនេះនៅតាមបណ្ដាប្រទេស
នានានោះ ព្រោះជម្ងឺអេដស៍នេះមានសក្ដានុពលខ្លាំងណាស់នៅលើពិភពលោក។
ហើយវិធីតែមួយគត់សម្រាប់ជួយអ្នកកើតជម្ងឺនេះបាន
គឺការផ្ដល់ថ្នាំពន្យារជីវិតឱ្យពួកគេដើម្បីបានរស់នៅបានយូរ។
ដូច្នោះវិធីដែលងាយស្រួល ចែកចាយថ្នាំនេះឱ្យដល់ពួកគេ
គឺមានតែឱ្យប្រទេសទាំងអស់នោះផលិតថ្នាំទាំងនេះដោយខ្លួនឯង។
សព្វថ្ងៃនេះ
នៅក្នុងប្រទេសកម្ពុជាយើងមានតែសហគ្រាសស៊ីភីអ៊ីតែប៉ុណ្ណោះ
ដែលបានទទួលអាជ្ញាប័ណ្ណផ្ដាច់មុខពីក្រសួងសុខាភិបាល
ដើម្បីធ្វើការផលិតថ្នាំពន្យារជីវិតសម្រាប់អ្នកជម្ងឺអេដស៍នេះ។
អ្វីដែលជាគោលបំណងសំខាន់ក្នុងការផលិតនេះ
គឺធ្វើយ៉ាងណាឱ្យអ្នកកើតជម្ងឺអេដស៍មានសុខភាពធូរស្រាល
ព្រមទាំងជួយសម្រាលឱ្យពួកគេទាំងនេះអាចទិញថ្នាំពន្យារជីវិតបាននៅក្នុង
ស្រុក ក្នុងតម្លៃទាបសមស្របនឹងជីវភាពរបស់ប្រជាពលរដ្ឋ។
ជាមធ្យមក្នុងមួយខែ
ពួកគាត់អាចចំណាយអស់ប្រមាណជា២៥ទៅ៣០ដុល្លារតែប៉ុណ្ណោះ។
លទ្ធភាពក្នុងការផលិតថ្នាំពន្យារជីវិតនៅកម្ពុជា
ថ្វីបើប្រទេសកម្ពុជាមានចំនួនអ្នកកើតជម្ងឺអេដស៍ច្រើនម៉ឺននាក់ក៏ដោយ
ក៏សហគ្រាសអាចផលិតថ្នាំពន្យារជីវិតសម្រាប់អ្នក
ជម្ងឺអេដស៍នេះបានគ្រប់គ្រាន់ទៅតាមតម្រូវការ
ឬចំនួនរបស់អ្នកកើតជម្ងឺអេដស៍ផងដែរ។ តែបច្ចុប្បន្ននេះ
សហគ្រាសនេះផលិតថ្នាំ
ពន្យារជីវិតសម្រាប់ផ្គត់ផ្គង់អ្នកកើតជម្ងឺអេដស៍បានត្រឹមតែប្រមាណ
ជាជាង៣០០នាក់តែប៉ុណ្ណោះ ដែលមានចំនួន១២ប្រភេទ។
ការផលិតតិចតួចនេះមិនមែនមានន័យថា
លោកអ្នកដែលកើតជម្ងឺអេដស៍ភាគច្រើនមិនបានប្រើប្រាស់សេវាថ្នាំពន្យារ
ជីវិតនោះទេ។
ការពិតថ្នាំពន្យារជីវិតសម្រាប់អ្នកកើតជម្ងឺអេដស៍ដែលផលិតក្នុងស្រុក
នៅមិនទាន់មានទីផ្សារល្អនៅឡើយនោះទេ
ដោយភាគច្រើនអ្នកកើតជម្ងឺអេដស៍បានទទួលសេវាថ្នាំនេះដោយមិនគិតថ្លៃ
ពីក្រសួងសុខាភិបាល ឬពីអង្គការក្រៅរដ្ឋាភិបាលផ្សេងៗ។
ចំពោះអ្នកកើតជម្ងឺអេដស៍ដែលចង់ទទួលសេវាថ្នាំដែលផលិតនៅក្នុងស្រុកនេះ
អាចទៅទិញនៅតាមឱសថស្ថាននានាបានដោយមានការណែនាំពីគ្រូពេទ្យ
ព្យាបាលច្បាស់លាស់។
គុណភាពថ្នាំពន្យារជីវិតផលិតនៅកម្ពុជា
មុននឹងអាចឈានទៅធ្វើការផលិតថ្នាំពន្យារជីវិតសម្រាប់អ្នកកើត
ជម្ងឺអេដស៍នេះបាន សហគ្រាសបានរកទិញវត្ថុធាតុដើម ទាំងអស់ពីបរទេស។
មានន័យថាថ្នាំដែលផលិតបានមកនេះគឺអាចមានគុណភាពប្រហាក់ប្រហែលទៅនឹង
ថ្នាំដែលផលិតនៅបរទេស។ ដើម្បីទទួលបាននូវលទ្ធផលទាំងនោះ
ថ្នាំពន្យារជីវិតសម្រាប់អ្នកកើតជម្ងឺអេដស៍
បានធ្វើការពិសោធន៍ពីគុណភាពនៅឯមន្ទីរពេទ្យ កាល់ម៉ែត
ដោយសាកល្បងឱ្យអ្នកកើតជម្ងឺអេដស៍លេបថ្នាំនេះ។
លទ្ធផលដែលទទួលបានគឺមានប្រសិទ្ធភាពចំនួន៩៥ .៧៧ភាគរយ
បើប្រៀបធៀបទៅនឹងថ្នាំដែលផលិតនៅឯបរទេស។
ទោះជាថ្នាំពន្យារជីវិតសម្រាប់អ្នកកើតជម្ងឺអេដស៍
អាចផលិតនៅស្រុកខ្មែរបានយ៉ាងណាក៏ដោយ ក៏លោកវេជ្ជបណ្ឌិត ហោ ប៊ុនឡេង
អគ្គលេខាធិការរង នៃអាជ្ញាធរជាតិប្រយុទ្ធប្រឆាំងនឹងជម្ងឺអេដស៍
បានឱ្យដឹងថា
លោកនៅមិនទាន់ដែលឃើញថ្នាំដែលផលិតនៅក្នុងស្រុកទាំងនោះនៅឡើយទេ។
ដោយលោកអះអាងថាបច្ចុប្បន្ននៅក្នុងប្រពន្ធ័សុខាភិបាលសាធារណៈនៅកម្ពុជា
បាននាំចូលថ្នាំពន្យារជីវិតសម្រាប់អ្នកកើតជម្ងឺអេដស៍តែពីប្រទេស
ឥណ្ឌា និងប្រទេសថៃតែប៉ុណ្ណោះ។
ដោយឡែកថ្នាំពន្យារជីវិតសម្រាប់អ្នកកើតជម្ងឺអេដស៍ផលិតនៅក្នុងស្រុកវិញ
ប្រព័ន្ធសុខាភិបាលមិនដែលទិញទាល់តែសោះ។
សូមលោកអ្នកកុំជឿលើការឃោសនាបោកប្រាស់ថា
ជម្ងឺអេដស៍អាចមានថ្នាំព្យាបាលជាសះស្បើយឱ្យសោះ។
ហើយលោកអ្នកគួរតែទៅមណ្ឌលប្រឹក្សាធ្វើតេស្ដឈាមរកមេរោគអេដស៍
និងរក្សាការសម្ងាត់ ដើម្បីពិនិត្យឱ្យដឹងថាលោកអ្នកកើតជម្ងឺអេដស៍
ឬក៏អត់។ យើងមិនអាចមើលថា អ្នកណាកើត ឬមិនកើត
ដោយមើលតែរូបរាងខាងក្រៅបាននោះទេ។
No comments:
Post a Comment