ប្រវត្ដិសាស្ដ្រ ដ៏រុងរឿងរបស់ព្រះរាជាណាចក្រកម្ពុជា ពិតជាល្បីរន្ទឺដែលកូនខ្មែរគ្រប់រូបមិនអាចបំភ្លេចបាន។ ប៉ុន្ដែជាអកុសល ខណៈពេលដែលខ្មែរជួបប្រទះភ្នក់ភ្លើងសង្គ្រាមជាច្រើនលើកច្រើនសា ហើយវប្បធម៌បរទេសជិតខាងបានហូរចូលមកនោះ ដែលធ្វើឲ្យកូនខ្មែរពិបាកបែងចែកថាមួយណាជារបស់ខ្មែរ ហើយមួយណាជារបស់បរទេស។
អ្វីដែលប្រជាពលរដ្ឋតែងតែយល់ច្រឡំថា វា ជាវត្ថុតំណាងរបស់ខ្មែរ និងឱនក្បាលគោរពរៀងរាល់ថ្ងៃ បែរជារបស់ប្រទេសជិតខាងទៅវិញ។ ជាក់ស្ដែង រានទេវតា គឺជាវត្ថុមួយក្នុងចំណោមរបស់របរដទៃទៀតដែលយុវវ័យគួរតែដឹងឲ្យ ច្បាស់មុននឹងសម្រេចចិត្ដទិញមកគោរពបូជា។
ពាក់ព័ន្ធនឹងការ យល់ច្រឡំនេះ លោក អុត សុខុម អាយុ៤៥ឆ្នាំ ជាជាងធ្វើរានទេវតា បានឲ្យដឹងថា៖
«គោលបំណងដែលខ្ញុំបង្កើតរានទេវតាតម្លៃរហូតដល់៥ពាន់ដុល្លារនេះ ពីព្រោះខ្ញុំចង់លើកស្ទួយវប្បធម៌ខ្មែរ និងទុកជាកេរដំណែលដើម្បីបង្ហាញដល់បរទេសអំពីអត្ដសញ្ញាណរបស់យើង ហើយ អ្វីដែលសំខាន់ គឺការទប់ស្កាត់លំហូរចូលរានទេវតាមកពីបរទេស និងឲ្យប្រជាពលរដ្ឋខ្មែរងាកមកប្រើរានទេវតារបស់ខ្មែរយើងវិញ»។
លោក បានលើកឡើងថា ដើម្បីបែងចែកថាតើមួយណាជារានទេវតារបស់ខ្មែរពិតៗ ហើយអាចសម្គាល់ត្រង់៤ចំណុច ដូចជា កំពូល ម៉ូដ ពណ៌ និងជើង។
លោក បានរៀបរាប់ប្រាប់ថា កំពូលរានទេវតាខ្មែរ មានរាងដូចកំពូលព្រះបរមរាជវាំង ព្រះវិហារ និងប្រាសាទចាស់ទ្រុឌទ្រោមមួយចំនួន។ រីឯពណ៌របស់វា មានពណ៌សាច់ លាយបៃតង ពោលគឺ ស្រដៀងនឹងព្រះបរមរាជវាំងនាពេលបច្ចុប្បន្ននេះអ៊ីចឹង។ ម្យ៉ាងវិញទៀត ម៉ូដ និងជើងរានទេវតាខ្មែរ មានរាងបួនជ្រុង ហើយរំលេចទៅដោយម៉ូដសម្បកឈូក និងជើងគ្រុឌ។
យ៉ាងណាមិញ យើងនៅតែអាចសម្គាល់រានទេវតាថៃតាមរយៈកំពូលរបស់វាមានរាងមូល និងមានគន្លាក់៨ជ្រុងដែលមិនសូវស្រួចទេ។ ពណ៌របស់វា មានភាពឆើតឆាយ និងរំលេចដោយពន្លឺភ្លឹបភ្លែត។ រីឯជើងក្រោមវិញ មាននាគ៤ ហើយម៉ូដរាង៤ជ្រុងលយចេញមកក្រៅ។
ជាចុងក្រោយ លោក សុខុម បានផ្ដែផ្ដាំដល់យុវវ័យខ្មែរគ្រប់រូបថា ក្នុងនាមជាកូនខ្មែរ យើងគួរតែប្រើរានទេវតារបស់ខ្មែរ ដើម្បីលើកកម្ពស់វប្បធម៌ដ៏ល្អផូរផង់របស់យើង បើមិនដូច្នេះទេ វានឹងបាត់បង់នៅថ្ងៃណាមួយមិនខាន។
គួររំឭកថា ដើម្បីងាយស្រួលក្នុងការកំណត់ចំណាំមួយណាជារានទេវតាខ្មែរ អ្នកអាចរកទិញនៅម្ដុំរង្វង់មូលចោមចៅ ឬនៅជិតសាកលវិទ្យាល័យបញ្ញាសាស្ដ្រសាខាធំ៕
No comments:
Post a Comment