ដើម្បីបានរៀនចេះអក្សរ ប្អូនៗកុមារនៅភូមិ Decun ខេត្ត Guizou ភាគនិរតីប្រទេសចិន ពីមួយថ្ងៃទៅមួយថ្ងៃ ត្រូវធ្វើដំណើរតាមខ្សែកាបរ៉ក ឆ្លងកាត់ភ្នំ២ ដើម្បីទៅដល់សាលារៀន ។
តាម DailyMail មធ្យោបាយដឹកជញ្ជូនដ៏គ្រោះថ្នាក់នេះ ការពិតទៅ វាជាការរីកចំរើនមួយរបស់ពួកក្មេងៗ ដែលពុំនោះសោត គេត្រូវចំណាយពេល ៥ ម៉ោង ដោយថ្មើជើង ទើបទៅដល់សាលារៀន ។
នៅឆ្នាំ២០០២ បុរសក្នុងភូមិនេះ ឈ្មោះ Hui Defaing បានច្នៃប្រឌិតដោយខ្លួនឯង នូវខ្សែកាបរ៉កនេះ ។ Hui ពោលថាៈ ១ថ្ងៃៗ ក្មេងៗ ត្រូវដើរក្នុងកំណាត់ផ្លូវយ៉ាងឆ្ងាយ ដើម្បីទៅសាលារៀន និងត្រលប់មកផ្ទះវិញ ។ ពេលជិតដល់ កូនៗខ្ញុំដល់អាយុត្រូវចូលសាលា ខ្ញុំក៏សំរេចចិត្តធ្វើខ្សែកាបរ៉កនេះ ។ វាបានជួយក្មេងៗជាង ១០០ នាក់ ធ្វើដំណើរពីភូមិទៅសាលារៀន ជារៀងរាល់ថ្ងៃ ។
ដើម្បីសំរេចបានខ្សែកាបរ៉កនេះ លោក Hui និងមនុស្ស ២០នាក់ទៀត ក្នុងភូមិ បានធ្វើវាអស់រយៈពេល ១ខែ ។ នេះក៏ជាមធ្យោបាយធ្វើដំណើររបស់ប្រជាជនប្រមាណ ២០០០ នាក់ ក្នុងភូមិ Decum ក្នុងការប្រាស្រ័យទាក់ទងនឹងពិភពខាងក្រៅផងដែរ ។
លោក Hui ឲ្យដឹងថា ការឆ្លងតាមរយៈខ្សែកាបនេះ ចំពោះសិស្ស គឺ ១យន់ (ប្រមាណជិត ៣ កាក់ដុល្លារ) រីឯចំពោះមនុស្សចាស់ គឺ ២យន់ ។
កុមារីសិស្សសាលាម្នាក់ ប្រាប់ថាៈ ពេលណាក៏ដោយ ដែលអង្គុយក្នុងកន្ត្រកនេះ ក្មួយមានអារម្មណ៍ថា បេះដូងស្ទើលោតចេញក្រៅតែម្តង ៕
No comments:
Post a Comment