យោង តាមការសិក្សាមួយដោយវិទ្យាស្ថានអន្តរជាតិសំរាប់សុខភាពសកល ដែលមានទីតាំងនៅក្នុងសាកលវិទ្យាល័យ UN University ក្នុងទីក្រុងតូក្យូ ប្រទេសជប៉ុន បានអោយដឹងថា កំរិតខ្ពស់នៃជាតិពុលដែលគេស្គាល់ថា ជាថ្នាំសម្លាប់សត្វល្អិតប្រភេទ Organochlorine ហៅកាត់ថា OCPs នោះ ត្រូវបានរកឃើញលើពពួកបន្លែ ត្រី និងសាច់នានា ដែលមានដាក់លក់នៅតាមបណ្តាទីផ្សារក្នុងខេត្តចំនួន ៣ គឺ ខេត្តកណ្តាល កំពង់ចាម និងខេត្តក្រចេះ។
ការសិក្សាដែលចេញផ្សាយកាលពីខែកញ្ញានេះ បាននាំយកសំណាកម្ហូបអាហារពីតាមបណ្តាទីផ្សារក្នុងខេត្តកណ្តាល កំពង់ចាម និងខេត្តក្រចេះ ដើម្បីរកអោយឃើញនូវកំហាប់ជាតិថ្នាំ OCPs ម្ហូបអាហារផ្សេងគ្នា និងបានវាយតំលៃពីហានិភ័យចំពោះសុខភាព។ នៅក្នុងចំណោមសំណាកដែលគេនាំយកពីបណ្តាទីផ្សារក្នុងខេត្តទាំង ៣ នេះ បន្លែបង្ការ និងសាច់ក្នុងខេត្តកណ្តាលមានជាតិថ្នាំ OCPs ក្នុងកំរិតខ្ពស់ជាងគេ។ ការសិក្សានេះបានអោយដឹងថា ប្រជាពលរដ្ឋដែលរស់នៅក្នុងខេត្តកណ្តាល ប្រឈមនឹងការកើតជំងឺមហារីកក្នុងកំរិតខ្ពស់ជាងគេ ដោយសារការបរិភោគបន្លែ និងសាច់ត្រីដែលមានជាតិថ្នាំ OCPs ចូលទៅក្នុងខ្លួន។
បរិមាណច្រើនបំផុតនៃជាតិថ្នាំ OCPs ដែលត្រូវបានរកឃើញគឺជាប្រភេទសារធាតុ Dichlorodiphenyltrichloroethane ជាជាតិគីមីដ៏ចម្រូងចម្រាសម្យ៉ាងដែលគេហៅជាទូទៅថា DDT ដែលត្រូវបានហាមឃាត់នៅទូទាំងពិភពលោក មិនអោយប្រើប្រាស់ក្នុងផ្នែកកសិកម្មឡើយ។ DDT មានបរិមាណ ៦៣ ភាគរយនៅក្នុងសំណាកម្ហូបអាហារនៅក្នុងខេត្តទាំង ៣ នេះ។
ការសិក្សានេះ បានអោយដឹងទៀតថា ផលប៉ះពាល់ចំបងរបស់ OCPs ចំពោះសុខភាពមនុស្ស គឺការពិបាកដកដង្ហើម ឈឺក្បាល ជំងឺសរសៃប្រសាទ ឬជំងឺផ្លូវចិត្ត ក្រហាយស្បែក និងស្រទាប់ភ្នាសជាលិកា ជំងឺសើស្បែក ប្រព័ន្ធសុំាចុះខ្សោយ រោគមហារីក និងប៉ះពាល់ដល់ការបន្តពូជផងដែរ។ កំរិតជាតិថ្នាំ OCPs ក្នុងម្ហូបអាហារក្នុងខេត្តទាំង៣ ខាងលើនេះ គឺខ្ពស់ជាងកំរិតជាតិថ្នាំ OCPs ដែលគេរកឃើញក្នុងម្ហូបអាហារនៅប្រទេសវៀតណាមទៀត។
លោក ព្រាប វីសាតូ ប្រធានស្តីទីនៃនាយកដ្ឋានការពារដំណាំនៃក្រសួងកសិកម្មបានមាន ប្រសាសន៍ថា បច្ចុប្បន្ននេះ គ្មានច្បាប់ដែលហាមឃាត់ការប្រើប្រាស់ថ្នាំសម្លាប់សត្វល្អិតដ៏ គ្រោះថ្នាក់នេះឡើយ ហើយបន្ទាប់ពីប្រជាពលរដ្ឋបានបរិភោគម្ហូបអាហារដែលមានជាតិថ្នាំ សម្លាប់សត្វល្អិតដ៏គ្រោះថ្នាក់នេះហើយ ពួកគេអាចមានជំងឺធ្ងន់ធ្ងរដូចជា ជំងឺមហារីកសួត ជំងឺបេះដូង ហើយក៏អាចមានផលប៉ះពាល់ដល់ការបន្តពូជដូចជា ទារកកើតមកមិនគ្រប់លក្ខណៈផងដែរ។
លោក កៀម ម៉ាការ៉ាឌី ប្រធានកម្មវិធីបរិស្ថាន និងសុខភាពនៅមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាបានមានប្រសាសន៍ថា គ្មានការបណ្តុះបណ្តាល ឬការផ្តល់ពត៌មានសំរាប់ក្រុមកសិករដែលប្រើប្រាស់ថ្នាំសម្លាប់ សត្វល្អិតនោះទេ។ លោកបានបន្តថា បណ្តាក្រុមហ៊ុនផលិត ឬលក់ថ្នាំសំលាប់សត្វល្អិតមិនដែលបញ្ជាក់អំពីផលអវិជ្ជមាន នៃថ្នាំសំលាប់សត្វល្អិតដូចជាថា តើវាអាចបង្កគ្រោះថ្នាក់ដល់សុខភាពរបស់ប្រជាពលរដ្ឋ ឬក៏ដល់បរិស្ថានយ៉ាងណាខ្លះឡើយ។
No comments:
Post a Comment