ក្រៅពីប្រើសម្រាប់ផ្សំអាហារ អំបិលមានប្រយោជន៍ច្រើនយ៉ាងទៀត ដែលស្ត្រីមេផ្ទះគួរដឹង.... ។១. សម្អាតសម្ភារធ្វើពីស្ពាន់ ប្រាក់ និងទង់ដែង : លាយអំបិល និងទឹកខ្មេះឲ្យខាប់ៗ រួចប្រើខាត់សម្ភារលោហៈឲ្យភ្លឺចែងចាំង ។
២. កម្ចាត់ក្លិនបំពង់បង្ហូរទឹក : ផ្សំអំបិល ១/២ ចានចង្កឹះ
ជាមួយទឹកក្ដៅក្នុងបរិមាណស្មើគ្នា ចាក់ចូលបំពង់ទឹកដើម្បីកម្ចាត់ក្លិន និងរំលាយកំណកជាតិខ្លាញ់ ដែលប្រមូលផ្ដុំក្នុងបំពង់ ។
៣. កម្ចាត់កំណកជាតិខ្លាញ់ : ខាត់កំណកខ្លាញ់ក្នុងខ្ទះ ដោយអំបិល នោះកំណកខ្លាញ់នឹងបាត់អស់ ហើយថែមទាំងងាយស្រួលលាងសម្អាតផងដែរ ។
៤. កម្ចាត់ក្លិនជ្រញ់ : ជ្រលក់ក្រណាត់សើមៗក្នុងអំបិល រួចយកទៅខាត់លើជ្រញ់ ដើម្បីកម្ចាត់ក្លិនផ្អាប់ ដែលប្រមូលផ្ដុំពីការហាន់អាហារច្រើនមុខ ។
៥. ការពារអាហារជាប់គូទខ្ទះ : រោយអំបិលចូលទៅលីងក្នុងក្នុងខ្ទះស្ងួត មុនប្រើខ្ទះចៀនអាហារ វានឹងជួយមិនឲ្យអាហារជាប់គូទខ្ទះ ថែមទាំងការពារការកើតផ្សែងទៀតផង ។
៦. សម្អាតម៉ាស៊ីនឆុងកាហេ្វ : ដាក់អំបិល ៤-៥ ស្លាបព្រាកាហ្វេ ចូលក្នុងម៉ាស៊ីនឆុងកាហ្វេ តាមធម្មតា វានឹងជួយធ្វើការសម្អាត និងកម្ចាត់កំណកនៅក្នុងម៉ាស៊ីន ។
៧. សម្អាតអេប៉ុង : បន្ទាប់ពីលាងអេប៉ុងស្អាតហើយ ចូរត្រាំអេប៉ុងក្នុងទឹកអំបិលត្រជាក់ៗ ដើម្បីការពារមេរោគបាក់តេរី ។
៨. កម្ចាត់ក្លិនស្បែកជើង : រោយអំបិលក្នុងស្បែកជើង នៅពេលយប់ រួចយកវាចេញឲ្យអស់នៅពេលព្រឹក ។
៩. សម្ចាត់ស្នាមឆូត លើគ្រឿងសង្ហារឹម : ផ្សំអំបិល ១ ស្លាព្រាកាហ្វេជាមួយប្រេងអូលីវ ល្មមក្លាយជាគ្រឿងផ្សំស្ងួតៗ ខ្ចប់ក្នុងក្រណាត់ទន់ៗ រួចប្រើខាត់លើស្នាមឆូត របស់គ្រឿងសង្ហារឹមរហូតបាត់អស់ ។
១០. បន្ថែមភាពស្រស់ឆើតដល់ពណ៌សម្លៀកបំពាក់ : បន្ថែមអំបិល ១/២ ចានចង្កឹះ ចូលក្នុងផើងបោកសម្លៀកបំពាក់ ដើម្បីឲ្យពណ៌សម្លៀកបំពាក់ មានភាពស្រស់ថ្លាថ្មីឆើត ។
១១. កម្ចាត់ស្នាមផ្សិត : ផ្សំទឹកក្រូចឆ្មារជាមួយអំបិល លាយលើកំណកផ្សិតរួចញីស្រាលៗ ហើយជម្រះដោយទឹកឲ្យស្អាត និងហាលថ្ងៃឲ្យស្ងួត ។
១២. ពន្លត់ភ្លើងពីប្រេង : បើមានភ្លើងឆាបឆេះឡើង ដោយសារប្រេង ចូររោយអំបិលចូលទៅ ដើម្បីពន្លត់ភ្លើង កុំប្រើទឹកស្អាតឲ្យសោះ ។
១៣. កែបញ្ហាឈឺ-ក : ផ្សំអំបិល ១ ស្លាបព្រាកាហ្វេ ក្នុងទឹកក្ដៅឧណ្ហៗមួយកែវ រួចប្រើខ្ពុរក្នុងក ។
១៤. សម្អាតធ្មេញ និងអញ្ចាញ : ផ្សំអំបិល ២ ភាគ និងសូដ្យូមប៊ីការបូណាត ១ ភាគ រួចប្រើច្រាសដុសធ្មេញ ។
១៥. ខ្ពុរមាត់ : ផ្សំអំបិល និងសូដ្យូមប៊ីការបូណាត ក្នុងបរិមាណស្មើគ្នា រួចដួសគ្រឿងផ្សំ ១ ស្លាបព្រាកាហ្វេ ផ្សំទឹកមួយកែវ ដើម្បីប្រើជំនួសទឹកខ្ពុរមាត់ ។
១៦. ស្អំភ្នែក : លាយអំបិល ១/២ ស្លាបព្រាកាហ្វេ និងទឹក ១/២ លីត្រ ត្រាំកន្សែងពោះគោ ក្នុងទឹកអំបិលរួចដាក់លើភ្នែក បើភ្នែកហើមចូរដាក់ស្អំឲ្យកាន់តែយូរ ។
១៧. ត្រាំជើង : ផ្សំទឹកក្ដៅឧណ្ហៗ ក្នុងសីតុណ្ហភាពសមល្មម រួចបន្ថែមអំបិល ១/២ ចានចង្កឹះចូលទៅ ត្រាំជើងដើម្បីឲ្យមានអារម្មណ៍ស្រួលខ្លួន ។
១៨. បណ្ដេញខ្មូត និងស្រមោច : រោយអំបិលត្រង់បរិវេណដែលមានខ្មូត និងស្រមោចវារឆ្លងកាត់ នោះអំបិល និងជួយបណ្ដេញពពួកសត្វល្អិតចង្រៃនេះ ឲ្យបាត់អស់ ៕
No comments:
Post a Comment