យោងតាមការរៀបចំចាត់តាំងព្រះរាជពិធីបុណ្យ ទ្វាទសមាស បុណ្យប្រពៃណីជាតិ ប្រពៃណីព្រះពុទ្ធ
សាសនា បុណ្យជាតិ-អន្តរជាតិ និងយោងតាមផែនការណែនាំ ស្តីពីការរៀបចំពិធីបុណ្យវិសាខបូជា គណៈកម្មាធិការជាតិរៀបចំបុណ្យជាតិ-អន្តរជាតិ បានប្រកាសថា គណៈកម្មាធិការជាតិរៀបចំបុណ្យជាតិ-អន្តរជាតិ សហការជាមួយក្រសួងធម្មការ និងសាសនា រាជធានីភ្នំពេញ ខេត្តកណ្តាល ខេត្តកំពង់ស្ពឺ ខេត្តកំពង់ឆ្នាំង និងខេត្តកំពង់ចាម នឹងចាត់តាំងរៀបចំកម្មវិធីបុណ្យវិសាខបូជា ជាផ្លូវការនៅព្រះមហាសក្យមុនីចេតិយ ភ្នំព្រះរាជទ្រព្យ (ឧដុង្គ) ស្រុកពញាឮ ខេត្តកណ្តាល ដើម្បីឧទ្ទិសចំពោះថ្ងៃជាមង្គលទាំងបី គឺថ្ងៃប្រសូតចាកឧទរព្រះមាតា ថ្ងៃត្រាស់ដឹងអនុត្តរសម្មាសម្ពោធិញ្ញាណ និងថ្ងៃរំលត់ខន្ធចូលកាន់ព្រះនិព្វាន នៃព្រះសម្មាសម្ពុទ្ធបរមគ្រូនៃយើង ។កម្មវិធី ថ្ងៃសៅរ៍ ១៥កើត ខែពិសាខ ព.ស២៥៥៦ ត្រូវនឹងថ្ងៃទី៥ ខែឧសភា ឆ្នាំ២០១២ ចាប់ពីម៉ោង៧ព្រឹកទៅ នឹងមានពិធីដង្ហែប្រទក្សិណជុំវិញភ្នំព្រះរាជទ្រព្យ ជាទីតាំងព្រះមហាសក្យមុនីចេតិយ ថ្វាយគ្រឿងសក្ការបូជា សូត្របទសរភញ្ញ នមស្សការព្រះរតនត្រ័យ សមាទានសីល ប្រកាសវិសាខបូជា និងដាក់បាត្រប្រគេនព្រះសង្ឃ៣០០អង្គ ។ ពេលរសៀលចាប់ពីម៉ោង២តទៅ នមស្សការព្រះរតនត្រ័យ សមាទានសីល សូត្រនមក្ការគាថា និងសម្តែងធម្មទេសនា ។
ថ្ងៃអាទិត្យ ១រោច ខែពិសាខ ព.ស២៥៥៦ ត្រូវនឹងថ្ងៃទី៦ ខែឧសភា ឆ្នាំ២០១២ ចាប់ពីម៉ោង៨ព្រឹកទៅ ទុកឱកាសប្រគេនព្រះសង្ឃ និងជូនពុទ្ធបរិស័ទបំពេញកុសលដោយសទ្ធាជ្រះថ្លាតាមប្រពៃណី ។
អ្នកមានបំណងចូលរួមសូមនាំយកទៅជាមួយចង្ហាន់ ម្ហូបខ្ចប់សម្រាប់ដាក់បាត្រ ប្រគេនព្រះសង្ឃ៣០០អង្គ និងគ្រឿងសក្ការបូជាមាន ទៀន ធូប ផ្កាភ្ញី សម្រាប់ថ្វាយព្រះមហាសក្យមុនីចេតិយ និងព្រះបរមសារីរិកធាតុនៃព្រះសម្មាសម្ពុទ្ធបរមគ្រូជាអម្ចាស់ នៅព្រឹកថ្ងៃ១៥កើត ខែពិសាខ ត្រូវនឹងថ្ងៃទី៥ ខែឧសភា ឆ្នាំ២០១២ ចាប់ពីម៉ោង៧ព្រឹកទៅ ៕
No comments:
Post a Comment