ទាំងនៅពេលមុនប្រជុំ និងទាំងនៅពេលកំពុងដំណើរការប្រជុំរបស់គណៈកម្មាធិការបេតិកភណ្ឌពិភពលោកនៅទីក្រុងប៉ារីស ប្រទេសបារាំង ដែលបានចាប់ផ្ដើមកាលពីថ្ងៃទី១៩ ដល់ថ្ងៃទី២៩ ខែមិថុនា ឆ្នាំ២០១១នេះ អ្នកនយោបាយជាតិនិយមជ្រុលសៀមបានរៀបចំសេនារីយ៉ូជាពីរក្រុម ដើម្បីធ្វើការអុកឡុកបំពុលបរិយាកាស ភូតកុហក បំភ័ន្ដមតិប្រជាជាតិសៀមខ្លួនឯង និងបំភ័ន្តមតិអន្តរជាតិ ប្រឆាំងទាំងកំរោលទៅដំណើរការប្រជុំរបស់គណៈកម្មាធិការបេតិកភណ្ឌពិភពលោក ក្នុងការអនុវត្តផែនការគ្រប់គ្រងប្រាសាទព្រះវិហារ ដែលត្រូវបានអនុម័តទទួលយកតាំងពីសម័យប្រជុំលើកទី៣៤ ឆ្នាំ២០១០ នៅក្រុងប្រេស៊ីលីយ៉ា ប្រទេសប្រេស៊ីលមកម្ល៉េះ ។
ការបរាជ័យលើកទី១ កាលពីសម័យប្រជុំលើកទី៣៤ បានធ្វើឲ្យក្រុមអ្នកនយោបាយវង្វេងប្រវត្តិសាស្ដ្រសៀម បានរៀបចំនូវយុទ្ធសាស្ដ្រថ្មី ដែលមានសេណារីយ៉ូចំនួន២ ដើម្បីទប់ស្កាត់គណៈកម្មាធិការបេតិកភណ្ឌពិភពលោកឲ្យពន្យារនូវផែនការគ្រប់គ្រងប្រាសាទព្រះវិហាររបស់កម្ពុជា នាសម័យប្រជុំលើកទី៣៥ នៅទីក្រុងប៉ារីស ប្រទេសបារាំង ។
សេណារីយ៉ូទី១ គឺសៀមបានរៀបក្រុមវង្វេងប្រវត្តិសាស្ដ្រអាវលឿង ដែលជាទូទៅគេដឹងថា គឺជាក្រុមរបស់នាយករដ្ឋមន្ត្រីចាំផ្ទះ អាភីស៊ីត និងជាក្រុមពួកអាមាត្យដែលមានមូលដ្ឋានបញ្ជាការនៅក្នុងវាំង ។ នយោបាយក្រុមនេះ គឺដុតកំហឹងជាតិនិយមជ្រុលនៅកណ្ដាលទីក្រុងបាងកក និងបង្កបាតុកម្មគំរាមកំហែង ហើយបានដាក់លិខិតយ៉ាងកំរោលគាបសង្កត់ទៅអង្គការយូណេស្ដូដែលមានទីស្នាក់ការនៅទីក្រុងបាងកក ឲ្យដកប្រាសាទព្រះវិហារចេញពីបញ្ជីបេតិកភណ្ឌពិភពលោក ហើយត្រូវតែពន្យារនូវផែនការអភិរក្សប្រាសាទព្រះវិហារ ។ មិនតែប៉ុណ្ណោះ ក្រុមនេះថែមទាំងគំរាម និងប្រមាថអង្គការយូណេស្កូ បើមិនធ្វើតាមសំណើរបស់ខ្លួនទេ នឹងបណ្ដេញស្ថាប័នអន្តរជាតិមួយនេះឲ្យចេញពីប្រទេសសៀម ។ យោងតាមច្បាប់អន្តរជាតិប្រទេសសៀមគ្មានសិទ្ធិបន្តិចណាសោះ ហើយក៏គ្មានហេតុផលណាមួយ បង្ខំឲ្យគណៈកម្មាធិការបេតិកភណ្ឌពិភពលោក ធ្វើតាមសំណើអគតិរបស់ខ្លួន ក្នុងការដកប្រាសាទព្រះវិហារចេញពីបញ្ជីនោះទេ ហើយក៏គ្មានសិទ្ធិគំរាមគណៈកម្មាធិការបេតិកភណ្ឌពិភពលោក ឲ្យពន្យារពេលផែនការអភិរក្សប្រាសាទព្រះវិហារនេះដែរ ។
ជាងនេះទៅទៀតប្រាសាទព្រះវិហារត្រូវបានចុះបញ្ជីជាសម្បត្តិវប្បធម៌របស់ពិភពលោកតាំងពីឆ្នាំ២០០៨ មកម្ល៉េះ ហើយគណៈកម្មាធិការបេតិកភណ្ឌពិភពលោក ក៏សម្រេចទទួលយកផែនការអភិរក្សប្រាសាទតាំងពីសម័យប្រជុំលើកទី៣៤ ស្របតាមរដ្ឋជាភាគី នៃអនុសញ្ញាឆ្នាំ១៩៧២ ស្ដីពីការការពារបេតិភណ្ឌសម្បត្តិវប្បធម៌ និងធម្មជាតិ ។
សេណារីយ៉ូទី២ គឺក្រុមគណៈប្រតិភូសៀម ដែលទៅចូលរួមក្នុងកិច្ចប្រជុំលើកទី៣៥ របស់គណៈកម្មាធិការបេតិកភណ្ឌពិភពលោកនៅទីក្រុងប៉ារីស ប្រទេសបារាំង ពីថ្ងៃទី១៩ ដល់ ២៩ ខែមិថុនា ឆ្នាំ២០១១ ។ ក្រុមប្រតិភូនេះ គឺមានតួនាទីសំខាន់ណាស់ក្នុងកិច្ចការងារបញ្ចុះបញ្ចូល ភូតកុហក បំពុលបរិយាកាសព័ត៌មាន ដើម្បីឲ្យប្រទេសចំនួន១៨៦ ដែលជារដ្ឋភាគី នៃអនុសញ្ញាឆ្នាំ១៩៧២ ស្ដីពីការការពារបេតិកភណ្ឌសម្បត្តិវប្បធម៌ និងធម្មជាតិ ដែលក្នុងនោះមានប្រទេសចំនួន២១ ជាសមាជិកគណៈកម្មាធិការបេតិកភណ្ឌពិភពលោក ហើយប្រទេសកម្ពុជា ជាអនុប្រធានក្នុងអាណត្តិឆ្នាំ២០១១ ផងនោះ ជឿទៅលើការភូតកុហករបស់ពួកគេ ដើម្បីឲ្យគណៈកម្មាធិការគាំទ្រការពន្យារពេល និងទាត់ចោលផែនការគ្រប់គ្រងប្រាសាទព្រះវិហាររបស់កម្ពុជា ។
សារជូនជនរួមជាតិពីប្រតិភូកម្ពុជា ចូលរួមសម័យប្រជុំលើកទី៣៥ របស់គណៈកម្មាធិការបេតិកភណ្ឌពិភពលោកនៅទីក្រុងប៉ារីស ដឹកនាំដោយឯកឧត្តមបណ្ឌិតសភាចារ្យ សុខ អាន កាលពីថ្ងៃទី២៦ ខែមិថុនា ឆ្នាំ២០១១ បានបញ្ជាក់យ៉ាងច្បាស់ថា ការប្រើចិត្តសាស្ដ្រប្រកបដោយល្បិចកលពិសពុល ក្រឡិចក្រឡុច បំភ្លៃការពិត ពោរពេញទៅដោយគំនិតឈ្លានពានរបស់គណៈប្រតិភូសៀមខាងលើនេះ ត្រូវបានទទួលបរាជ័យយ៉ាងអាម៉ាស់ជាទីបំផុត ដោយប្រធានមជ្ឈមណ្ឌលបេតិកភណ្ឌពិភពលោក បានបដិសេធ និងទាត់ចោលទាំងស្រុង នូវរាល់សំណើរបស់សៀម ក្នុងការជំទាស់ទៅនឹងផែនគ្រប់គ្រង និងអភិវឌ្ឍន៍ប្រាសាទព្រះវិហារ ហើយគណៈកម្មាធិការបានបញ្ជាក់ឡើងវិញនូវសេចក្ដីសម្រេចចិត្តលើកទី៣១ នៅទីក្រុងក្រៃឆឺត លើកទី៣២ នៅទីក្រុងកេបិច លើកទី៣៣ នៅទីក្រុងសេវិល និងលើកទី៣៤ នៅទីក្រុងប្រេស៊ីលីយ៉ាដែលចំណុចនេះ បញ្ជាក់ពីការទទួលយកនូវផែនការគ្រប់គ្រងដែលកម្ពុជា បានដាក់កាលពីឆ្នាំ២០១០ ។ គណៈកម្មាធិការក៏បានទទួលស្គាល់ផងដែរ អំពីការខូចខាតប្រាសាទព្រះវិហារ ដោយសារការវាយប្រហារដោយគ្រប់ផ្លោង ហើយនឹងបញ្ជូនជំនាញការមកជួសជុល នៃការខូចខាតនេះ ។
ការបរាជ័យរបស់សៀមនៅពេលនេះ គឺមានតម្លៃធំធេងណាស់សម្រាប់ជាបទពិសោធន៍របស់ពួកវង្វេងប្រវត្តិសាស្ដ្រដែលតែងតែមានបំណងទុច្ចរិតឈ្លានពានទឹកដីកម្ពុជា ជារៀងដ៏រាបមក ហើយពួកគេត្រូវតែយល់ថា កម្ពុជានៅពេលនេះ គឺមិនមែនកម្ពុជានៅសម័យលង្វែកឡើយ ។ ម្យ៉ាងទៀតការបរាជ័យនេះ ក៏បានឆ្លុះបញ្ចាំងឲ្យឃើញយ៉ាងច្បាស់នូវការមិនគាំទ្រពីសហគមន៍អន្តរជាតិ ចំពោះទង្វើភូតកុហក ក្រឡិចក្រឡុច ច្រងេងច្រងាង និងអសីលធម៌របស់អ្នកនយោបាយសៀម ។ ជាពិសេសប្រទេសសៀម ត្រូវបានបាត់បង់កិត្តិយសយ៉ាងធ្ងន់ធ្ងរ និងអាម៉ាស់ជាទីបំផុតនៅលើឆាកអន្តរជាតិ រហូតធ្វើឲ្យរដ្ឋាភិបាលចាំផ្ទះ អាភីស៊ីត បង្ខំចិត្តលាចេញពីសមាជិកអនុសញ្ញារបស់គណកម្មាធិការបេតិកភណ្ឌពិភពលោក ៕
No comments:
Post a Comment