ខេត្តកំពត ៖ ការបង្កគ្រោះថ្នាក់ចរាចរណ៍ដោយសារការលែងសត្វពាហនៈ តែងកើតឡើងជាញឹកញាប់លើកំណាត់ផ្លូវជាតិលេខ៣ចេញពីកំពតទៅទល់នឹងព្រំប្រទល់ខេត្តព្រះសីហនុ ត្រឹមស្ពានព្រែកត្រពាំងរពៅ ឃុំព្រែកត្នោត ស្រុកទឹកឈូ ។
តាមការកត់សម្គាល់ប្រជាពលរដ្ឋក្នុងស្រុកទឹកឈូប៉ែកខាងលិចទីរួមខេត្តចាប់ពីបឹងទូករហូតដល់ឃុំកោះតូច និងឃុំព្រែកត្នោត ដែលមានលំនៅឋានជាប់ដងផ្លូវជាតិខ្លះ និងក្រោមផ្លូវជាតិខ្លះ បានលែងគោរបស់ខ្លួនឱ្យដេកនិងដើរប្រសេកប្រសាចនៅលើដងផ្លូវជាតិពេលយប់ យ៉ាងអនាធិបតេយ្យ ដោយគ្មានឃើញសមត្ថកិច្ចឬអាជ្ញាធរភូមិ-ឃុំមានវិធានការណែនាំហាមឃាត់ឬផាកពិន័យឱ្យរាងចាលដល់ម្ចាស់គោ-ក្របីទាំងនោះឡើយ ។ ផ្ទុយទៅវិញជារៀងរាល់យប់ អ្នកបើកបរយានយន្តគ្រប់ប្រភេទឆ្លងកាត់ពីក្រុងកំពតឆ្ពោះទៅខេត្តព្រះសីហនុ តែងជួបប្រទះគោ-ក្របីឈរឬដេកនៅកណ្តាលផ្លូវជាតិដូចជាក្រោលរបស់វាទៅហើយ មិនដឹងជាម្ចាស់វានៅឯណាទេ ។ បញ្ហានេះមិនមែនទើបតែកើតមានទេ គឺមានយូរហើយ ។ ដូច្នេះអ្នកបើកបរយានយន្តគ្រប់ប្រភេទលើដងផ្លូវជាតិនោះត្រូវប្រុងប្រយ័ត្នឱ្យមែនទែន បើហ៊ានតែធ្វេសប្រហែសបន្តិចច្បាស់ជាជួបគ្រោះថ្នាក់មិនខាន ដោយសារក្រុមសមត្ថកិច្ចចរាចរណ៍គោ-ក្របីឈរទំពាអៀងចំកណ្តាលថ្នល់គ្មានខ្លាចរថយន្តបន្តិចណាសោះឡើយ ។
ភាពអនាធិបតេយ្យលែងគោ-ក្របីឱ្យដេកនៅលើដងផ្លូវជាតិពេលយប់នេះ បើសិនជាបង្កឱ្យមានគ្រោះថ្នាក់ជាយថាហេតុណាមួយនោះពិតជារកមុខម្ចាស់មិនឃើញទេ។ តាមរយៈព័ត៌មាននេះ សង្ឃឹមថា សមត្ថកិច្ច អាជ្ញាធរនឹងមានវិធានការមិនខាន ៕
No comments:
Post a Comment