មន្ត្រីជំនាញខាងមីន របស់មជ្ឈមណ្ឌលកម្ចាត់មីនកម្ពុជា ហៅកាត់ជាភាសាអង់គ្លេសថា CMAC បានប្រកាសថា គ្រាប់បែកចង្កោម ដែលទាហានថៃ បានប្រើប្រាស់ក្នុងសង្គ្រាមឈ្លានពានកម្ពុជា នៅតំបន់ព្រមដែនប្រាសាទព្រះវិហារ ក្នុងពេលកន្លងមក បានរាយប៉ាយ នៅតំបន់ភ្នំព្រះវិហារ ដែលគិតជាផលប៉ះពាល់លើផ្ទៃដីសរុបប្រមាណ ១៨២ គីឡូម៉ែត្រក្រឡា។ ផលប៉ះពាល់ពីគ្រាប់បែកចង្កោមនោះ នឹងធ្លាក់មកលើប្រជាជនកម្ពុជា នៅតំបន់ព្រំដែនប្រាសាទព្រះវិហារយ៉ាងពិតប្រាកដ។
ជាមួយនឹងសេចក្តីប្រកាសខាងលើ មន្ត្រីជំនាញដោះមីនកម្ពុជា ក៏បានបង្ហាញកង្វល់ចំពោះគ្រោះថ្នាក់ពីគ្រាប់បែកចង្កោមដ៏ប្រល័យរបស់ថៃ នៅលើទឹកដីកម្ពុជា។ ម្យ៉ាងទៀត អាជ្ញាធររដ្ឋាភិបាលកម្ពុជា ក៏បានប្រាប់ទៅភាគីថៃ ឲ្យបង្ហាញទិន្នន័យដ៏ច្បាស់លាស់មួយ អំពីគ្រាប់បែកចង្កោម ដែលខ្លួនបានបាញ់ចូលទឹកដីកម្ពុជា និងនៅត្រង់ចំណុចណាខ្លះ? ដើម្បីជាសញ្ញា មន្ត្រីជំនាញដោះមីនកម្ពុជា រុករកឃាតករបិទមុខមួយនេះ។
លោក សាឯម ពណ្ណារាយ ប្រធានកងឯកភាពតំចាត់មីនទី៣ របស់ CMAC ប្រចាំទិសប្រាសាទព្រះវិហារ បានបញ្ជាក់នៅក្នុងសន្និសីទកាសែត កាលពីរសៀលថ្ងៃទី៧ ខែកក្កដា ឆ្នាំ២០១១ ដែលស្ថិតនៅមិនឆ្ងាយពីប្រាសាទព្រះវិហារ ដែលជាតំបន់ផ្ទុះសង្គ្រាមថា គ្រាប់បែកចង្កោមត្រូវបានទាហានថៃ ប្រើប្រាស់បាញ់ចូលក្នុងទឹកដីកម្ពុជា នៅចន្លោះពីថ្ងៃទី៤ ដល់ថ្ងៃទី៧ ខែកុម្ភៈ ឆ្នាំ២០១១ នៅតំបន់ប្រាសាទព្រះវិហារ ក្នុងទឹកដីកម្ពុជា ចម្ងាយពីជាង ១០ គីឡូម៉ែត្រ ទៅជាង ២០ គីឡូម៉ែត្រ ពីព្រំដែន។
លោក សាឯម ពណ្ណារាយ បានបញ្ជាក់ប្រាប់បណ្ដាញសារព័ត៌មានជាតិ និងអន្តរជាតិថា ជម្លោះនៃសង្គ្រាមឈ្លានពានពីប្រទេសថៃ គឺគ្រាប់បែកចង្កោម បានធ្លាក់រាយប៉ាយ នៅលើភូមិជាច្រើនរបស់កម្ពុជា ដែលក្នុងនោះ មានភូមិធម្មជាតិសម្ដេចតេជោ ហ៊ុន សែន ភូមិសែនជ័យ និងភូមិបុស្បូវ ស្ថិតក្នុងឃុំកន្ទួត ស្រុកជាំក្សាន្ត ខេត្តព្រះវិហារ។ ក្នុងចំណោមគ្រាប់បែកចង្កោមទាំងនោះ ត្រូវបានមន្ត្រី CMAC បញ្ជាក់ទាំងក្ដីកង្វល់ថា វាបានប៉ះពាល់លើផ្ទៃដីសរុបរហូតដល់ ១៨២ គីឡូម៉ែត្រក្រឡាឯណោះ។
ទោះបីជាយ៉ាងណាក៏ដោយ មន្ត្រីទទួលបន្ទុកដោះមីនខាងលើ មិនបានបញ្ជាក់អំពីចំនួនតួលេខពិតប្រាកដពីគ្រាប់បែកចង្កោមរបស់ថៃនោះឡើយ។ ប៉ុន្តែលោកបានរកឃើញមកដល់ពេល នូវគ្រាប់បែកចង្កោមធុនគ្រាប់ផ្លោងប្រភេទ ១០៥ និងធុន ១៥៥ មីលីម៉ែត្រ ប្រមាណ ៤១៤ គ្រាប់ នៅតំបន់ប្រាសាទព្រះវិហារ និងនៅជុំវិញប្រាសាទព្រះវិហារ ។
លោក សាឯម ពណ្ណារាយ បានបញ្ជាក់ថែមទៀតថា ក្នុងគ្រាប់ផ្លោងមួយគ្រាប់របស់ថៃ ដែលជាប្រភេទ M 85 គឺមានគ្រាប់បែកចង្កោមតូចៗជាង ៤០គ្រាប់ និងប្រភេទគ្រាប់ M 42 មួយគ្រាប់ មានគ្រាប់បែកចង្កោមចំនួន ៨៦គ្រាប់។ គ្រាប់នីមួយៗ មានអំបែងប្រមាណ ៤០០ អំបែងឯណោះ ។ គ្រាប់នីមួយៗ ក៏មានកម្លាំងផ្ទុះរហូតទៅដល់ ៤០០០ អង្សា។
អ្នកជំនាញរូបនេះ បានពន្យល់ថា គ្រាប់បែកចង្កោម គឺជាគ្រាប់បែកប្រឆាំងទ័ពថ្មើរជើង ហើយគ្រាប់បែកនោះ ធ្លាក់ត្រង់ណា គឺទីនោះ មិនអាចឲ្យកងទ័ព ឬប្រជាជន ឈរជើង និងរស់នៅបានឡើយ មានន័យថា ថៃបានគ្រប់គ្រងតំបន់នោះ។
លោក សាឯម ពណ្ណារាយ បានបន្តទៀតថា គ្រាប់ផ្លោង ដែលធ្លាក់ ហើយគ្រាប់បែកចង្កោមតូចៗ ធ្លាក់មកដល់ដីហើយ មិនផ្ទុះវាបង្កការគ្រោះថ្នាក់យ៉ាងខ្លាំងក្លាបំផុត នៅពេលណាប្រជាជនកម្ពុជា ទៅប៉ះពាល់ នោះវានឹងផ្ទុះភ្លាម។ គ្រាប់បែកចង្កោមតូចមួយគ្រាប់ អាចសម្លាប់មនុស្សបានជាច្រើននាក់ ថែមទៀតផង។
លោកបញ្ជាក់ថា នៅចំការមីនមួយ ក្នុងឃុំកន្ទួតស្រុកជាំក្សាន្ត កងឯកភាពកំចាត់មីនទី៣ បានដោះរួចរាល់ជាស្ថាពរលើផ្ទៃដីចំនួន ៤០០ ហិកតា ឥឡូវគ្រាប់បែកចង្កោម បានធ្លាក់មកលើផ្ទៃចំនួន ៤០០ ហិកតា ដែលដោះរួចនោះ ដែលជាហេតុធ្វើឲ្យ CMAC ប្រឈមទៅនឹងការរៀបដោះមីនជាថ្មី ហើយប្រើប្រាស់រយៈពេលយូរតទៅទៀត ។
គេបានសិក្សាថា ចំនួន ៣ ភូមិ ដែលទទួលរងផលប៉ះពាល់គ្រាប់បែកចង្កោមនោះ គឺមានប្រជាជនសរុប ១៥៩៧ គ្រួសារ និងស្មើ ៥៥៦២ នាក់។ ប្រជាជនទាំងនោះ កំពុងតែបារម្ភគ្រប់បែបយ៉ាង អំពីគ្រោះថ្នាក់ ដែលបង្កឡើងដោយឃាតករបិទមុខ ( គ្រាប់បែកចង្កោម ) នោះ។
ចំណែកលោក ផៃ ស៊ីផាន អ្នកនាំពាក្យក្រសួងទីស្តីការគណៈរដ្ឋមន្ត្រី បានថ្លែងក្នុងសន្និសីទកាសែតនោះថា ភាគីថៃ គួរតែបង្ហាញពីទិន្នន័យមួយយ៉ាងពិតប្រាកដ ដល់ភាគីកម្ពុជា ពីចំនួនគ្រាប់បែកចង្កោម ហើយគ្រាប់នោះបាញ់ចេញពីគោលដៅណា ហើយធ្លាក់ចូលទឹកដីកម្ពុជានៅតំបន់ណា ដើម្បីងាយស្រួលសំរាប់កម្ពុជារុករក ។
លោក ផៃ ស៊ីផាន បញ្ជាក់ថា ថៃគួតែបង្ហាញការពិតដ៏ស្មោះត្រង់មួយ ចំពោះកម្ពុជា មិនត្រូវលាក់លៀម អំពីការអៀនខ្មាស់របស់ខ្លួន ចំពោះសកម្មភាពរបស់ខ្លួនឡើយ ព្រោះការប្រើប្រាស់គ្រាប់បែកចង្កោម គឺផ្ទុយទៅនឹងច្បាប់អន្តរជាតិ។
កាលពីពេលកន្លងទៅ Chuster Munition Coalition ( CMC ) ដែលជាចលនាសង្គមស៊ីវិលអន្តរជាតិមួយ បានធ្វើការប្រឆាំងការប្រើប្រាស់គ្រាប់បែកចង្កោម ហើយបានធ្វើសេចក្តីថ្លែងការណ៍ថ្កោលទោសថៃ ចំពោះគ្រាប់បែកចង្កោមនៅក្នុងប្រយុទ្ធគ្នាជាមួយកម្ពុជា កាលពីដើមខែកុម្ភៈកន្លងទៅ។
សេចក្តីថ្លែងការ គឺបានធ្វើឡើង បន្ទាប់ពីអគ្គរាជទូតថៃប្រចាំអង្គការសហប្រជាជាតិ ក្នុងក្រុងហ្សឺណែវ ប្រទេសស្វីស បានបញ្ជាក់នៅក្នុងកិច្ចប្រជុំមួយ នៅទីក្រុងហ្សឺណែវថា ទាហានថៃពិតជាបានប្រើប្រាស់ គ្រាប់បែកចង្កោមប្រឆាំងនឹងកម្ពុជាពិតមែន ។
គ្រាប់បែកចង្កោមរបស់ថៃ ដែលបានប្រើប្រាស់ ក្នុងសង្គ្រាមឈ្លានពានកម្ពុជា កាលពីដើមខែកុម្ភៈ ឆ្នាំ២០១១ បានឆក់យកជីវិតកងទ័ព និងប្រជាជនស្លូតត្រង់កម្ពុជាចំនួន ២ នាក់ និងធ្វើឲ្យបុរស ២ នាក់ ពិការដៃ ព្រមទាំង ៥ នាក់ផ្សេងទៀត របួសធ្ងន់។
ការលើកបង្ហាញរបស់មន្ត្រីជំនាញពីការប្រើប្រាស់គ្រាប់បែកចង្កោមរបស់ថៃ នៅព្រំដែនប្រាសាទព្រះវិហារ កាលពីថ្ងៃទី៧កក្កដា ឆ្នាំ២០១១ ជាផ្នែកមួយ នៅក្នុងកម្មវិធីជាស៊េរី ដែលរដ្ឋាភិបាលកម្ពុជា រៀបចំពិធីទ្រង់ទ្រាយធំ ដើម្បីសាទរខួប ៣ ឆ្នាំ ថ្ងៃចុះបញ្ជីប្រាសាទព្រះវិហារ ជាសម្បត្តិបេតិកភណ្ឌពិភពលោក ៕
No comments:
Post a Comment