ហេតុការណ៍នេះ កើតឡើងកាលពីវេលាម៉ោង១០ និង២០នាទី ថ្ងៃទី១៩កក្កដា ឆ្នាំ២០១១ នៅក្នុងសំណង់វារីអគ្គិសនីកំចាយ ស្រុកទឹកឈូ ខេត្តកំពត។
ជនរងគ្រោះ ឈ្មោះ ទួច ដារ៉ូ ភេទប្រុស អាយុ ២៣ឆ្នាំ ជាកម្មករសំណង់វារីអគ្គិសនីកំចាយ ស្នាក់នៅស្រុកទឹកឈូ ខេត្តកំពត។ យុវជននេះ ត្រូវដែកទំហំ ៣៥លី ប្រវែង ១,៥០ម៉ែត្រ ធ្លាក់លើ បណ្តាលឲ្យរបួស ធ្លាយស្លាបប្រចៀវស្តាំ ដល់គូទ ហើយត្រូវបញ្ជូនមកកាន់មន្ទីរពេទ្យកាល់ម៉ែត កាលពីម៉ោង១២ និង៣០នាទី ថ្ងៃត្រង់ ដើម្បីសង្គ្រោះបន្ទាន់។ សភាពជំងឺ ជនរងគ្រោះមានសង្ឃឹមរស់តិចណាស់។
មុនពេលកើតហេតុ ជនរងគ្រោះ រួមជាមួយមិត្តរួមការងារម្នាក់ បានធ្វើការហេវហត់ ក៏នាំគ្នាអង្គុយសម្រាកមួយភ្លែត ស្រាប់មានកម្មករម្នាក់ ដែលកំពុងធ្វើការងារនៅខាងលើខ្នងទំនប់វារីអគ្គិសនី កំពស់ប្រមាណជា ៥០ម៉ែត្រ បានធ្វើឲ្យធ្លាក់ដែកនោះ មកចំជនរងគ្រោះ បណ្តាលឲ្យរបួសធ្ងន់។
ភ្លាមៗនោះ គេបានបញ្ជូនជនរងគ្រោះមកសង្គ្រោះនៅមន្ទីរពេទ្យខេត្តកំពត តែដោយសភាពជំងឺធ្ងន់ធ្ងរពេក ក៏បញ្ជូនបន្ត មកមន្ទីរពេទ្យកាល់ម៉ែត៕
No comments:
Post a Comment