តុលាការយុត្តិធម៌អន្តរជាតិទីក្រុងឡាអេ ( ICJ) នឹងចេញដីកាសម្រេចរបស់ខ្លួននៅថ្ងៃទី១៨ ខែកក្កដាខាងមុខនេះទាក់ទងនឹងសំណើរបស់កម្ពុជាស្តីពីវិធានការបន្ទាន់ដើម្បីការពារប្រាសាទព្រះវិហារ។ នេះបើយោងតាមការប្រកាសឱ្យដឹងនៅថ្ងៃព្រហស្បតិ៍ ទី៧កក្កដានេះរបស់តុលាការក្រុងឡាអេ។ សេចក្តីប្រកាសព័ត៌មានរបស់ ICJ បានឱ្យដឹងទៀតថា ប្រធានតុលាការយុត្តិធម៌អន្តរជាតិក្រុងឡាអេនឹងអានដីការបស់តុលាការជូនភាគីពាក់ពន្ធ័ឲ្យបានដឹង។
រដ្ឋាភិបាលកម្ពុជា តាមរយៈលោកឧបនាយករដ្ឋមន្ត្រី ហោ ណាំហុង រដ្ឋមន្ត្រីក្រសួង
ការបរទេស បានដាក់ពាក្យប្តឹងទៅតុលាការក្រុងឡាអេកាលពីចុងខែមេសាដែលមាន
កម្មវត្ថុសំខាន់ពីរគឺ បណ្តឹងសុំបកស្រាយឡើងវិញនូវសាលក្រមតុលាការឡាអេឆ្នាំ១៩៦២ និងសុំចាត់វិធានការបន្ទាន់ដើម្បីការពារប្រាសាទព្រះវិហារចេញពីការឈ្លានពានរបស់ទាហានថៃ។
តុលាការក្រុងឡាអេបានលើកយកសំណើទី២របស់កម្ពុជាមកបើកសវនាការកាលពីចុងខែឧសភាដោយបានកោះហៅភាគីកម្ពុជានិងថៃឲ្យចូលរួម។ ក្នុងអង្គសវនាការនោះ គេបានមើលឃើញថា កម្ពុជាមានភស្តុតាងជាច្រើនដើម្បីបង្ហាញពីការឈ្លានពានរបស់ថៃមកលើប្រាសាទព្រះវិហារ។ ចំណែកភាគីថៃមានទឡ្ហីករណ៍យ៉ាងស្តួចស្តើងដើម្បីការពារខ្លួន។
យ៉ាងណាក៏ដោយគេនៅមិនទាន់ដឹងថា តុលាការក្រុងឡាអេនឹងសម្រេចយ៉ាងណានៅឡើយទេ ខណៈដែលកម្ពុជាសង្ឃឹមថា បញ្ហាព្រំដែនកម្ពុជាថៃនឹងបានធូរស្រាលឡើងវិញនៅពេលគណបក្សភឿថៃឡើងកាន់អំណាច៕
No comments:
Post a Comment