ស្របពេលដែលការចិញ្ចឹមសត្វត្រចៀកកាំ មានការកើនឡើង ដោយពុំមានការគ្រប់ គ្រងឱ្យបានត្រឹមត្រូវនោះ បានធ្វើឱ្យពលរដ្ឋក៏ដូចជាមន្ត្រីជំនាញ មានការព្រួយបារម្ភជាខ្លាំង អំពីបញ្ហានៃការចម្លងមេរោគជម្ងឺផ្តាសាយបក្សី ពីសត្វ មកមនុស្ស ព្រោះការចិញ្ចឹមសត្វនេះ ច្រើនធ្វើនៅតាមលំនៅឋានក្នុងទីប្រជុំជន។
លោក គីង សុខលីម ប្រធានការិយាល័យបសុព្យាបាលនៃមន្ទីរកសិកម្មខេត្តកោះកុង បានឲ្យដឹងថា សព្វថ្ងៃចំនួនអ្នកចិញ្ចឹមសត្វត្រចៀកកាំ នៅក្នុងខេត្ត ពិតជាមានការកើនឡើងមែន ប៉ុន្តែចំពោះតួលេខវិញ ខាងជំនាញលោកពុំទាន់ បានដឹងនៅឡើយ ព្រោះកន្លងមក កិច្ចការនេះ ពឹងផ្អែកទៅលើអាជ្ញាធរដែនដី ជាអ្នកគ្រប់គ្រង ។
លោក គីង សុខលីម បានឱ្យដឹងថា សត្វត្រចៀកកាំ ក៏ងាយចម្លងមេរោគផ្តាសាយបក្សីដែរ ហើយបើអ្នកចិញ្ចឹមពុំមានការយល់ដឹងច្បាស់លាស់ទេ នៅពេលអនាគតបញ្ហានេះ នឹងអាចកើតមានឡើង ព្រោះសត្វនេះ វាតែងតែធ្វើការបន្លាស់ទីពីកន្លែងមួយទៅកន្លែងមួយ ។
រីឯអ្នកចិញ្ចឹមវិញបាននិយាយឱ្យដឹងថា កន្លងមកការចិញ្ចឹមសត្វនេះ មិនដែលជួបមានបញ្ហាអ្វីទេ តែគេក៏មានការប្រុងប្រយ័ត្នផងដែរ ទាំងការថែទាំ ទាំងការរៀបចំទីកន្លែង ព្រោះការចិញ្ចឹមសត្វនេះ ត្រូវចំណាយដើមទុនច្រើនណាស់ រហូតដល់រាប់ម៉ឺនដុល្លារ ដើម្បីសង់ផ្ទះ និងទិញឧបករណ៍ភ្លេង សម្រាប់ចាក់ហៅវាឱ្យចូលមករស់នៅ ។
អ្នកចិញ្ចឹមបានឱ្យដឹងបន្ថែមថា តម្លៃនៅលើទីផ្សារសព្វថ្ងៃ ទឹកមាត់ស្ងួត មួយគីឡូក្រាម អាចលក់បានពី ២ ទៅ ៣ពាន់ដុល្លារ ។
សូមបញ្ជាក់ថាៈត្រចៀកកាំ គឺជាសត្វបក្សីមួយប្រភេទ ដែលគេចិញ្ចឹមយកទឹកមាត់ សម្រាប់ធ្វើជាថ្នាំប៉ូវ។ សព្វថ្ងៃស្របពេល ដែលទឹកមាត់វា កំពុងមានហាងឆេងខ្ពស់នៅលើទីផ្សារ គេសង្កេតឃើញថា អ្នកមានមួយចំនួននៅខេត្តកោះកុង កំពុងនាំគ្នា ងាកមកប្រកបមុខរបរចិញ្ចឹមសត្វប្រភេទនេះ នៅតាមលំនៅឋាន ក៏ដូចជានៅតាមដីឡូដិ៍។
ការចិញ្ចឹមត្រចៀកកាំ ត្រូវបានគេចាត់ទុកថា ជារឿងមួយសម្ងាត់ ព្រោះអ្នកចិញ្ចឹមមិនងាយទម្លាយឱ្យគេបានដឹង អំពីលក្ខណៈបច្ចេកទេស ដែលខ្លួនមានទេ ។ ចំពោះទីកន្លែង ដែលសត្វនេះ រស់នៅវិញ ក៏អ្នកចិញ្ចឹមមិនងាយឱ្យគេចូលទៅមើលដែរ ព្រោះខ្លាច មានក្លិនប្លែក ធ្វើឱ្យវាលែងហ៊ាន ចូលមករស់នៅ ៕
No comments:
Post a Comment