នៅរសៀលថ្ងៃទី១ កក្កដានេះ លោក ហៀក ចាន់លាង អភិបាលរងខណ្ឌមានជ័យ បានដឹកនាំមន្ត្រីជំនាញធ្វើការសម្របសម្រួលរវាងព្រះសង្ឃវត្តពោធិ៍ ព្រះបាត្រ ហៅវត្តច្បារអំពៅ ជាមួយលោក ជៀង ញឹប មុននឹងឈានទៅដល់ការកំណត់ព្រំដីរបស់វត្ត និងដីរបស់លោក ជៀង ញឹប។
ប៉ុន្តែការសម្របសម្រួល បានបរាជ័យ ដោយព្រះសង្ឃរាប់សិបអង្គ និងគណៈកម្មការវត្តបានជំទាស់។
ព្រះគ្រូចៅអធិវត្តច្បារអំពៅ ព្រះនាម ហោ សុខុន មានសង្ឃដីកាថា កាលពីថ្ងៃទី ៧ មេសា ឆ្នាំ ២០១១ កន្លងទៅនេះ លោក ជៀង ញឹប ម្ចាស់សំណង់ផ្ទះល្វែងមានទីតាំងនៅចំណុចមុខវត្តច្បារអំពៅ បានយកអេស្កាវាទ័រ មកឈូសឆាយ បោះបង្គោលថ្មរំលោភយកដីវត្តអស់ជាច្រើនម៉ែត្រក្រឡា។ ការឈូសឆាយនេះ ឈ្មោះ ជៀង ញឹប បានធ្វើដោយមិនជូនដំណឹងដល់ព្រះសង្ឃអាចារ្យ និងគណកម្មការវត្តឡើយ។ ទង្វើរំលោភបំពានខាងលើនេះ ធ្វើឲ្យវត្តបាត់បង់ដីជាច្រើនម៉ែត្រក្រឡា ដែលដីនេះជាគរុភណ្ឌវត្ត បានបន្សល់ទុកជាយូរមកហើយ។
ព្រះគ្រូ ហោ សុខុន មានសង្ឃដីកាបន្តថា ព្រះអង្គបានធ្វើលិខិតជូនលោក គួច ចំរើន អភិបាលខណ្ឌមានជ័យ ឲ្យជួយធ្វើអន្តរាគមន៍ពីករណីនេះ ហើយនៅរសៀលថ្ងៃទី ១ កក្កដានេះ គណៈកម្មការរបស់សាលាខណ្ឌមានជ័យដឹកនាំដោយលោកហៀក ចាន់លាង អភិបាលរងខណ្ឌ បានចុះមកសម្របសម្រួលករណីនេះ។ ប៉ុន្តែត្រូវទទួលបរាជ័យ មិនសម្រេចអ្វីទាំងអស់ ។ ព្រះអង្គបានបញ្ជាក់ថា ព្រះអង្គនឹងធ្វើលិខិតជូនសម្តេចអគ្គមហាសេនាបតីតេជោ ហ៊ុន សែន ជួយធ្វើអន្តរាគមន៍ពីរឿងដីនេះ ព្រោះជាសម្បត្តិសាធារណៈ មិនមែនទ្រព្យសម្បត្តិព្រះអង្គឯងនោះទេ ។
ចំណែកលោក ហៀក ចាន់លាង អភិបាលរងខណ្ឌមានជ័យ បានលើកឡើងថា លោកចុះមកសម្របសម្រួលរឿងនេះ គឺយោងតាមលិខិតរបស់សាលារាជធានីភ្នំពេញលេខ ២៨៤ ចុះថ្ងៃទី ៣ មិថុនា ២០១១ ចុះហត្ថលេខា ដោយលោកកែប ជុតិមា ដោយបញ្ជាក់ក្នុងកម្មវត្ថុថា ករណីសុំវាស់វែងរកព្រំដី និងសាងសង់របងរបស់លោកជៀង ញឹប។ ខ្លឹមសារលិខិតបញ្ជាក់ថា ចំពោះសំណើរសុំវាស់វែងរកព្រំដី និងសាងសង់របងរបស់លោក ជៀង ញឹប ស្ថិតនៅភូមិស្លែង សង្កាត់ច្បារអំពៅ២ សាលារាជធានីភ្នំពេញឯកភាពតាមមតិរបស់សាលាខណ្ឌ។ ប៉ុន្តែគួរសម្របសម្រួលជាមួយគណៈកម្មការវត្តជាមុនសិន។
ខណៈពេលការប្រឈមមុខដាក់គ្នារវាងព្រះសង្ឃ និងលោក ជៀង ញឹប មិនអាចសម្របសម្រួលបាន លោក ហៀក ចាន់លាង មានប្រសាសន៍ថា នឹងប្រគល់រឿងនេះ ឲ្យសាលារាជធានីភ្នំពេញជាអ្នកដោះស្រាយ ។
រីឯលោក ជៀង ញឹប បានលើកឡើងថា លោកមានប័ណ្ណសម្គាល់សិទ្ធិកាន់កាប់ប្រើប្រាស់ដីនេះ តាំងពីឆ្នាំ១៩៩៣ មកម្ល៉េះ។ គាត់មិនបានរំលោភយកដីវត្ត ឬស្រះវត្ត ដូចការចោទប្រកាន់របស់ព្រះសង្ឃឡើយ៕
No comments:
Post a Comment