ទីក្រុងថ្មីរបស់ខ្មែរឈ្មោះ ខេមបូឌា ថោន (Cambodia Town) នៅក្នុងក្រុងឡងប៊ិច (Long Beach) រដ្ឋកាលីហ្វ័រញ៉ា (California) សហរដ្ឋអាមេរិក ត្រូវបានពលរដ្ឋខ្មែរសម្ដែងការអបអរសាទរយ៉ាងខ្លាំង ក្នុងទិវាលើកផ្លាកសញ្ញាជាផ្លូវការកាលពីថ្ងៃទី១៦ ខែកក្កដា ឆ្នាំ២០១១។
លោក សាន រីជឺរ (Richer San) អនុប្រធានទីមួយក្រុមហ៊ុនខ្មែរ ឬហៅថា Cambodia Inc. មានប្រសាសន៍ថា លោកមានមោទនភាពណាស់ដែលពលរដ្ឋខ្មែរត្រូវបានអាជ្ញាធរក្រុងឡងប៊ិច អនុញ្ញាតឲ្យមានទីក្រុងខ្មែរសម្រាប់ទីផ្សារពាណិជ្ជកម្មខ្មែរមួយជាផ្លូវការនៅលើទឹកដីអាមេរិក ហើយថា តំណាងសហគមន៍ខ្មែរបានផ្ដើមគំនិតគ្នាស្នើសុំច្បាប់អនុញ្ញាតទទួលស្គាល់ជាផ្លូវការអស់រយៈពេលជាង ១០ឆ្នាំមកហើយ តែសេចក្ដីសម្រេចជាផ្លូវការ និងដំណើរការទើបបានបញ្ចប់សព្វគ្រប់នៅក្នុងខែកក្កដា ឆ្នាំនេះ។
លោកមានប្រសាសន៍បន្ថែមថា ៖ «ដែលយើងចង់ធ្វើនេះវាមានចំណុចសំខាន់ច្រើន។ សំខាន់ជាងគេគឺយើងចង់បន្តនូវវប្បធម៌ទុកឲ្យក្មេងស្រករក្រោយកើតនៅទីនេះ ក្មេងកើតនៅទីនេះគ្នាអត់ដឹងថា ឪពុកម្ដាយហ្នឹងមកពីណា មានទំនៀមទម្លាប់អីទេ។ ខេមបូឌា ថោន ដែលយើងបង្កើតនេះ ដើម្បីថែរក្សាទំនៀមទម្លាប់ប្រពៃណីរបស់យើង»។
លោក ឆាំង សុង ខ្មែរអាមេរិកាំងរស់នៅក្រុងទីក្រុងឡងប៊ិច ថ្លែងប្រាប់វិទ្យុអាស៊ីសេរីថា ឡងប៊ិចជាទីក្រុងមួយប្រជុំដោយពលរដ្ឋខ្មែរច្រើនជាងគេក្នុងសហរដ្ឋអាមេរិក ដែលមានពលរដ្ឋខ្មែររស់នៅជាង ៥ម៉ឺននាក់។ លោកថា ការបើកតំបន់សេដ្ឋកិច្ច និងវប្បធម៌ក្រុងខ្មែរនេះ ជាទីក្រុងខ្មែរទីមួយក្នុងប្រវត្តិសាស្ត្រនៅលើពិភពលោកហើយ ចាប់តាំងពីលោកដឹងក្ដីមក។
លោកថា ទីក្រុងដែលមានឈ្មោះខ្មែរនេះផ្ដល់ប្រយោជន៍ដល់ពលរដ្ឋខ្មែរជាច្រើន ៖ «ទីក្រុងខ្មែរហ្នឹងវាមានគោលបំណងធំជាផ្លូវការពីរ។ ទី១ ដើម្បីរក្សាចែកចាយវប្បធម៌ខ្មែរយើងទៅអាមេរិកាំងបរទេសឯទៀតៗទាំងអស់។ ទី២ ធំបំផុតទៀត គឺជាកន្លែងដែលលើកស្ទួយខ្មែរយើងឲ្យបានរកស៊ីចម្រុងចម្រើនក្នុងសហរដ្ឋអាមេរិក។ គោលបំណងមួយទៀតសម្រាប់ខ្ញុំដែលយល់ផ្ទាល់ វាជាស្ពានធំណាស់ដែលចម្លងខ្មែរយើងនៅសហរដ្ឋអាមេរិក និងខ្មែរនៅកម្ពុជាឯណោះ មិនដែលមានទេក្នុងប្រវត្តិសាស្ត្ររឿងនេះរឿងធំណាស់»។
ចំពោះការអបអរសាទរ និងការលើកផ្លាកសញ្ញានេះ ម្ចាស់ហាងខ្មែរ វ៉ែនហេង អ្នកស្រី អ៊ីម ផល្លា មានប្រសាសន៍ថា អ្នកស្រីសប្បាយចិត្តណាស់ ដោយសារអ្នកស្រីមានហាងលក់ម្ហូបអាហារខ្មែរដ៏ធំនៅទីនេះសម្រាប់បម្រើសហគមន៍ខ្មែរដូចនៅស្រុកខ្មែរដែរ ៖ «សប្បាយចិត្តណាស់ មានមោទនភាពយ៉ាងខ្លាំងដែលខ្មែរយើងមានឈ្មោះថា ក្រុងខ្មែរនៅឡងប៊ិច នៅក្នុងអាមេរិកនេះ។ ខ្ញុំភ្ញៀវខ្មែរខ្ញុំ ៩០ភាគរយខ្មែរ និយាយតែខ្មែរ ឮតែ China Town (ក្រុងចិន), Korea Town (ក្រុងកូរ៉េ) ឥឡូវខ្មែរយើងមានតំណាងខ្មែរនៅអាមេរិកហ្នឹង ខ្ញុំសប្បាយចិត្ត»។
អតីតប្រធានក្រុមប្រឹក្សាភិបាលនៃទីក្រុងខ្មែរ ឬ Cambodia Town ក្នុងក្រុងឡងប៊ិច អ្នកស្រី សាន សុទ្ធា មានប្រសាសន៍ដែរថា មុននឹងបានទទួលច្បាប់អនុញ្ញាតទទួលស្គាល់ពេញលេញពីអាជ្ញាធរនេះ ពលរដ្ឋខ្មែរនៅទីនោះបានប្រឹងប្រែងជួយគ្នាយ៉ាងពេញទំហឹង រិះរកមធ្យោបាយដើម្បីឲ្យបានការទទួលស្គាល់ជាផ្លូវការ។
អ្នកស្រី សាន សុទ្ធា បន្តដូច្នេះ ៖ «ចំពោះខ្លួនខ្ញុំផ្ទាល់គឺថា យើងមានសេចក្ដីរំភើប ហើយយើងមានមោទនភាពជាខ្លាំង ពីព្រោះកិច្ចការអស់នេះគឺថា ដែលយើងធ្វើហ្នឹង គឺថា មិនមែនបានមកស្រួលទេ ហើយក្នុងរយៈពេលបើយើងគិតអំឡុងពេលទៅ គឺថា តាំងពីក្រុមខ្មែរយើងបានចាប់ផ្ដើមមក គឺតាំងពី២០០១ ហើយរហូតដល់ទៅ២០១១ បើនិយាយពីភ្នំពេញ គឺឡងប៊ិចនេះហើយជាទីពីរ ក្រៅពីភ្នំពេញ»។
តំបន់សេដ្ឋកិច្ច និងវប្បធម៌ក្រុងខ្មែរ Cambodia Town, Inc ស្ថិតនៅផ្លូវអាណាហែម លេខ២២១០ E ជាន់ទីមួយ លេខ១០៣ ក្រុងឡងប៊ិច រដ្ឋកាលីហ្វ័រញ៉ា សហរដ្ឋអាមេរិក។ ទីក្រុងនេះបានបើកពិធីអបអរសាទរលើកផ្លាកសញ្ញាជាផ្លូវការនៅថ្ងៃទី១៦ ខែកក្កដា ឆ្នាំ២០១១ ដែលមានមនុស្សចូលរួមប្រមាណជាង ១០០នាក់៕
No comments:
Post a Comment