ខេត្តក្រចេះ ៖ នារីពីរនាក់បងប្អូនជាខ្មែរ អ៊ិស្លាម ត្រូវចោរប្លន់យកខ្សែ.កប្លាទីន៣ជី ខ្សែដៃប្លាទីន២ជី និងខ្សែជើងប្លាទីន២ជីកន្លះ ខណៈពេលទៅបោចស្មៅដំឡូងមីនៅចំការក្នុងស្រុកឆ្លូង ខេត្តក្រចេះ។ អំពើប្លន់នេះបានកើតឡើងកាលពីវេលាម៉ោង១១ព្រឹកថ្ងៃទី២៨ មិថុនា ដោយជនម្នាក់បានដើរចូលទៅក្នុងចំការហើយយកពូថៅកាប់នារីជាបងចំនួន៨ពូថៅដួលសន្លប់រួចដោះយកគ្រឿងអលង្ការទាំងអស់ បន្ទាប់មកកាប់នាងជាប្អូនចំនួន៦ពូថៅទៀត បណ្តាលឱ្យនារីទាំងពីរនាក់បងប្អូនរងរបួសយ៉ាងធ្ងន់ធ្ងរ។ នេះជាមេរៀនមួយជាក់ស្តែងបំផុត ដែលមិនគប្បីពាក់គ្រឿងអលង្ការនៅកន្លែងស្ងាត់ ឬគ្មានសុវត្ថិភាពឡើយ។
ស្ត្រីឈ្មោះលាស់ ស៊ីម៉ាស់ អាយុ៤៤ឆ្នាំ ជាខ្មែរអ៊ិស្លាម និងជាម្តាយនារីរងគ្រោះ មានទីលំនៅភូមិវាលធំ ឃុំព្រៃស្មាន់ ស្រុកឆ្លូង បានរៀបរាប់ឱ្យដឹងថា គាត់មានកូន៤នាក់សុទ្ធតែស្រី ប្រកបរបរធ្វើចំការដោយដាំដំឡូងមីបាន ៦០អារ ហើយនៅថ្ងៃកើតហេតុគាត់ពីរនាក់ប្តីជិះម៉ូតូមួយគ្រឿង ចំណែកកូនស្រី២នាក់បងប្អូនជិះម៉ូតូមួយគ្រឿងទៀត ចេញទៅធ្វើស្មៅចំការទាំងអស់គ្នា ប៉ុន្តែរូបគាត់ និងប្តីបានឆៀងទៅយកកូនម្នាស់មកដាំហើយឱ្យកូនស្រីជិះម៉ូតូទៅមុនប្រហែលជាមួយម៉ោង។ ពេលទៅដល់ចំការ កូនស្រីទាំងពីរនាក់បានទៅយកកាំបិតផ្គាក់ និងពូថៅកាប់ស្មៅ លុះពេលធ្វើស្មៅបានបន្តិច ស្រាប់តែជនម្នាក់ឈ្មោះប៉ាស៊ី ជាខ្មែរអ៊ិស្លាម មានផ្ទះនៅទល់មុខចំការរបស់គាត់ដើរចូលមកក្នុងចំការ។
ស្ត្រីជាម្តាយបានរៀបរាប់ទៀតថា ពេលនោះកូនស្រីឈ្មោះម៉ើស សុទ្ធពិណាស់ អាយុ២២ឆ្នាំ ដែលស្គាល់គ្នាបានសួរនាំធម្មតា។ ពេលនាងបងនិយាយជាមួយជននោះ ប្អូនស្រីឈ្មោះម៉ើស គឹមម៉ារីយ៉ាស អាយុ១៨ឆ្នាំ បានដើរទៅផឹកទឹកចម្ងាយប្រមាណ១០០ម៉ែត្រ ស្រាប់តែឮបងស្រីស្រែកអូយ ក៏ស្រែកសួរ។ លុះពេលនាងរត់មកមើលឃើញបងស្រីត្រូវជននោះកាប់ជាច្រើនពូថៅដួលសន្លប់ ហើយជននោះរត់មកកាប់នាងជាប្អូនស្រីចំនួន៦ពូថៅទៀត តែនាងរត់រួច ចំណែកជននោះក៏ដើរចូលទៅដោះយកខ្សែ.ក ខ្សែដៃ និងខ្សែជើងរបស់បងស្រីរួចគេចខ្លួនបាត់។ ឯប្អូនស្រីរត់ ទៅបានចម្ងាយប្រមាណ១០០ម៉ែត្រជួបនឹងអ្នកជិះម៉ូតូតាមផ្លូវស្រែកឱ្យគេជួយ ទើបអ្នកជិះម៉ូតូនោះ ទៅស្រែកហៅគេឯងឱ្យមកជួយសែងដាក់អង្រឹង ដឹកតាមម៉ូតូឆ្លងទន្លេសេកុងយកទៅមន្ទីរពេទ្យស្រុកឆ្លូង ហើយបញ្ជូនបន្តទៅព្យាបាលនៅមន្ទីរពេទ្យមិត្តភាពខ្មែរ-សូវៀត។
ប្រភពព័ត៌មានដដែលបន្តទៀតថា យុវជនដែលកាប់កូនស្រីគាត់២នាក់បងប្អូននោះគឺយកកាំបិតផ្គាក់ និងពូថៅ របស់គាត់កាប់តែម្តង ដែលមុនដំបូងយកកាំបិតផ្គាក់កាប់តែកាប់អត់មុត ទើបយកពូថៅ កាប់កូនស្រីបងត្រូវផ្ទៃមុខ ក្បាល ក និងដៃ ឯនាងប្អូនកាប់ត្រូវក្បាល មាត់ និងថ្ពាល់។
នៅមន្ទីរពេទ្យមិត្តភាពខ្មែរ-សូវៀត នាងបងឈ្មោះម៉ើស សុទ្ធពិណាស់ មិនទាន់ដឹងខ្លួននៅឡើយទេ ចំណែកនាងប្អូនឈ្មោះម៉ើស គឹមម៉ារីយ៉ាស អាចនិយាយបានតិចៗ។ គ្រូពេទ្យបានធ្វើការវះកាត់ក្បាលរបស់នាងបងហើយ ប៉ុន្តែស្ថិតក្នុងដំណាក់កាលតាមដាននៅឡើយ។ ម្តាយនារីរងគ្រោះបានឱ្យដឹងដែរថា កូនស្រីរបស់គាត់ទាំងពីរនាក់នេះសុទ្ធតែមានគូដណ្តឹងហើយ បម្រុងរៀបការនៅខែធ្នូ ចុងឆ្នាំនេះ ក្រោយពេលប្រមូលផលដំឡូងស្រាប់តែមានរឿងដូច្នេះទៅវិញ។
ម្តាយរបស់នារីរងគ្រោះទាំងពីរនាក់បានឱ្យដឹងថា ពេលមកដល់មន្ទីរពេទ្យម្តាយរបស់ជនល្មើសបានមកជួយមើលនៅមន្ទីរពេទ្យដែរព្រោះម្តាយរបស់ជនល្មើស និងគាត់ត្រូវជាបងប្អូនជីដូនមួយនឹងគ្នា។ ប៉ុន្តែគាត់បញ្ជាក់ថា ទោះបីជាម្តាយរបស់ជនល្មើសមកជួយមើលក៏ដោយ ក៏ក្រុមគ្រួសាររបស់គាត់នៅតែដាក់ពាក្យបណ្តឹងឱ្យចាប់ខ្លួនជនដៃដល់រូបនោះឱ្យបាន ដើម្បីយកមកផ្តន្ទាទោសតាមច្បាប់ និងសងថ្លៃព្យាបាលរបួសកូនស្រីគាត់ទាំងពីរនាក់៕
No comments:
Post a Comment