ក្រសួងប្រៃសណីយ៍ និងទូរគមនាគមន៍ បានចាប់ផ្ដើមបិទសេវាទូរស័ព្ទចល័តប្រើសេវាប្រទេសថៃ ដែលបានដំណើរការនៅក្នុងប្រទេសកម្ពុជា ខុសច្បាប់អស់ជាច្រើនឆ្នាំមកហើយ។
មន្ត្រីក្រសួងប្រៃសណីយ៍ និងទូរគមនាគមន៍ ឲ្យដឹងនៅថ្ងៃទី២១ ខែកក្កដា ថា ប្រពន្ធទូរស័ព្ទចល័តថៃ ត្រូវបានអាជីវករខ្មែរទិញសេវាពីថៃ ហើយដំឡើងអង់តែនតូចៗ ដូចជាបំពង់ទីបកម្ពស់ពី ៣០ ទៅ ៤០ម៉ែត្រ ហើយចាប់សេវាពីប្រទេសថៃ ចូលមកប្រទេសកម្ពុជា ចម្ងាយប្រហែលជា ១០០គីឡូម៉ែត្រឯណោះ។
លោក ចែម សង្វា អគ្គនាយកនៃនាយកដ្ឋានត្រួតពិនិត្យទូរគមនាគមន៍ ក្រសួងប្រៃសណីយ៍ និងទូរគមនាគមន៍ មានប្រសាសន៍ថា អាជីវករខ្មែរបានដំឡើងអង់តែនទូរស័ព្ទថៃ ដោយទាញយកសេវាទូរស័ព្ទពីប្រទេសថៃចូលមកប្រទេសកម្ពុជា ដើម្បីធ្វើអាជីវកម្ម និងប្រើប្រាស់ផ្ទាល់ខ្លួនផង ដោយធ្វើឲ្យរដ្ឋាភិបាលខ្មែរខាតប្រាក់ពី ៦០០ ទៅ ១.០០០ដុល្លារក្នុងអង់តែនទូរស័ព្ទមួយគ្រឿងៗ។
លោកថា អង់តែនខុសច្បាប់ប្រើសេវាថៃ មានសរុបប្រហែល ១០០អង់តែននៅខេត្តបន្ទាយមានជ័យ ពោធិ៍សាត់ បាត់ដំបង សៀមរាប និងខេត្តឧត្ដរមានជ័យ ៖ «ក្នុងនាមក្រសួង សូមអំពាវនាវដល់បងប្អូនប្រជាពលរដ្ឋនៅតាមបណ្ដាខេត្តបន្ទាយមានជ័យ ឧត្តរមានជ័យ បាត់ដំបង ពោធិ៍សាត់ និងប៉ៃលិន ដែលកំពុងប្រើប្រាស់ឧបករណ៍ប្រភេទនេះ ហៅថា អិនធើ ហ្វូន ដែលជាសេវារបស់ថៃ ចូលមកទឹកដីយើង សូមឲ្យបងប្អូនប្រមូលឧបករណ៍ហ្នឹងយកទៅឲ្យក្រុមហ៊ុនថៃ នៅស្រុកថៃវិញ ដើម្បីចៀសវាងប្រឈមមុខផ្លូវច្បាប់ ប៉ះពាល់ដល់អាជីវកម្ម និងបាត់បង់ផលប្រយោជន៍ប្រជាពលរដ្ឋ។ ហ្នឹងជំហានទី១ ក្រសួងឲ្យបងប្អូនស្ម័គ្រចិត្តដាក់ចុះដោយខ្លួនឯង»។
លោកបន្តថា ក្រៅពីខាតបង់ថវិកាជាតិ ការប្រើប្រាស់សេវាទូរស័ព្ទថៃ ខុសច្បាប់នេះ ក៏ជាការគំរាមកំហែងដល់សន្តិសុខជាតិពីសំណាក់ចាប់ក្រុមចាប់ជំរិត និងក្រុមភេរវកម្មអាចប្រើសេវានេះ ហើយប៉ូលិសខ្មែរមិនមានឯកសារស្រាវជ្រាវស៊ើបអង្កេត ព្រោះថា រាល់ឯកសារបញ្ជីស្នាម វិក្កយបត្រប្រាក់ចំណាយអ្វីៗទាំងអស់មិនបានថតចម្លង ឬកត់ត្រាទុកដោយអាជ្ញាធរខ្មែរទេ គឺឯកសារនានានៅប្រទេសថៃទាំងអស់។
ក្រសួងប្រៃសណីយ៍ និងទូរគមនាគមន៍ កាលពីពេលថ្មីៗកន្លងទៅនេះ បានចេញសេចក្ដីប្រកាសជូនដំណឹងមួយដល់សាធារណជនខ្មែរ ដែលដំឡើងទូរស័ព្ទចល័តថៃខុសច្បាប់នៅតាមខេត្តនានាជាប់ព្រំដែនថៃ ដូចជាខេត្តកោះកុង ប៉ៃលិន ពោធិ៍សាត់ បាត់ដំបង បន្ទាយមានជ័យ ឧត្តរមានជ័យ រួមទាំងខេត្តសៀមរាប ឲ្យរើអង់តែនឈប់ប្រើសេវាថៃ ហើយងាកមកប្រើប្រព័ន្ធក្រុមហ៊ុនក្នុងប្រទេសកម្ពុជាវិញ ដើម្បីសុវត្ថិ និងប្រាក់ចំណូលរដ្ឋ។
សប្ដាហ៍កន្លងទៅនេះ ក្រសួងប្រៃសណីយ៍ និងទូរគមនាគមន៍ បានចុះបង្ក្រាបនៅខេត្តសៀមរាប ដែលប្រើប្រព័ន្ធសេវាទូរស័ព្ទថៃខុសច្បាប់ ដែលមានអង់តែន ៣៥ ហើយភាគច្រើនស្ថិតនៅក្នុងស្រុកដាច់ស្រយាល។
លោក ចាន់ សារ៉េន អធិការស្រុកក្រឡាញ់ មានប្រសាសន៍ថា ប្រជាជនរបស់លោកបាននាំគ្នាប្រើប្រព័ន្ធទូរស័ព្ទក្រុមហ៊ុននៅក្នុងស្រុកវិញហើយ បន្ទាប់ពីក្រសួងប្រៃសណីយ៍ បានចុះទៅទម្លាក់អង់តែនប្រព័ន្ធទូរស័ព្ទថៃ នៅក្នុងស្រុករបស់លោករួចមក ៖ «កាលមុនប្រើ ឥឡូវឈប់អស់ហើយ គេមកទម្លាក់អង់តែនអស់ហើយ...»។
លោកស្រី ជា សុទ្ធា មន្ត្រីសិទ្ធិមនុស្សលីកាដូ (Licadho) ប្រចាំខេត្តបន្ទាយមានជ័យ ឲ្យដឹងថា ប្រជាជននៅតាមខេត្តក្បែរព្រំដែនថៃ ចូលចិត្តប្រើសេវានេះ ព្រោះពួកគាត់ធ្លាប់ប្រើយូរមកហើយ តាំងពីឆ្នាំ១៩៩០ ជាងមកម្ល៉េះ ដោយសារកាលនោះកម្ពុជា មិនទាន់មានប្រព័ន្ធទូរស័ព្ទចែកចាយដល់តំបន់ដាច់ស្រយាលទាំងនោះទេ ៖ «កន្លងមកខ្ញុំធ្លាប់តេ ព្រោះថាសេវាថោក ស្រួលប្រើ។ យូរហើយ និយាយទៅតាំងពីមានការឆ្លងដែនខ្មែរ-ថៃ ហ្នឹងមក ទូរស័ព្ទប្រព័ន្ធថៃ ចាប់ផ្ដើមមានប្រើ មានតេទៅអាមេរិកទៅអីតាំងពីសម័យយើង ១៩៩០ ជាងមកហ្នឹង»។
ទន្ទឹមនឹងក្រសួងប្រៃសណីយ៍បន្ទន់ឥរិយាបថទន់ភ្លន់អំពាវនាវដល់ប្រជាជនខ្មែរឲ្យបិទ ឬក៏ទម្លាក់អង់តែនទូរស័ព្ទថៃខុសច្បាប់ ដែលពួកគេបានប្រើរួចមក លោក ចែម សង្វា បានបញ្ជាក់ផងដែរថា ក្រសួងប្រៃសណីយ៍ និងទូរគមនាគមន៍ក៏នឹងដាក់វិធានការក្ដៅផងដែរ ដោយបានដាក់កំណត់ឲ្យប្រជាពលរដ្ឋ និងអាជីវករខ្មែរណាដែលប្រើប្រាស់ ឬប្រកបរបររកស៊ីបម្រើសេវាទូរស័ព្ទថៃ ខុសច្បាប់នេះ ឲ្យឈប់ប្រើប្រាស់ និងទម្លាក់អង់តែនទូរស័ព្ទចោលឲ្យអស់ក្នុងរយៈពេលមួយសប្ដាហ៍ខាងមុខជាដាច់ខាត បើមិនដូច្នោះទេ ពួកគេនឹងប្រឈមមុខនឹងផ្លូវច្បាប់។
លោកបានបញ្ជាក់ថា បន្ទាប់ពីក្រសួងបានទម្លាក់អង់តែន និងបិទទូរស័ព្ទនៅខេត្តសៀមរាប រួចមក ក្រសួងនឹងធ្វើការបន្តទៅទៀតនៅខេត្តផ្សេងៗ ដូចជាខេត្តបាត់ដំបង ពោធិ៍សាត់ និងបន្ទាយមានជ័យ ជាដើម ដើម្បីបញ្ចប់ការប្រើប្រាស់សេវាទូរស័ព្ទថៃ ខុសច្បាប់នេះឲ្យអស់៕
No comments:
Post a Comment