ថ្ងៃនេះគឺជាថ្ងៃទី១៥ កក្កដា ឆ្នាំ២០១១ ថ្ងៃដែលកម្ពុជាចងចាំមិនភ្លេចខួបគម្រប់បីឆ្នាំគត់នៃការឈ្លានពានរបស់ទាហានថៃមកលើទឹកដីកម្ពុជា។ កាលណោះទាហានថៃបានប្រើប្រាស់ព្រះសង្ឃនិងដូនជី៣នាក់ឲ្យចូលក្នុងទឹកដីកម្ពុជាទាំងបំពាន។ ក្រោយពេលដែល អាជ្ញាធរកម្ពុជាចាប់ខ្លួន ទាហានថៃបានយកលេសទន្ទ្រានចូលក្នុងទឹកដីកម្ពុជាតែម្តងនៅថ្ងៃទី១៥ កក្កដា ឆ្នាំ២០០៨ ពោលគឺមួយសប្តាហ៍ក្រោយពីប្រាសាទព្រះវិហារត្រូវបានចុះក្នុងបញ្ជីនៃសម្បត្តិបេតិកភណ្ឌពិភពលោករបស់អង្គការយូណេស្កូ។
ចាប់តាំងពីពេលនោះមក រដ្ឋាភិបាលរបស់នាយករដ្ឋមន្ត្រីអាភីស៊ីត វាចាជីវ៉ា បានបង្កសង្គ្រាមជាចំហជាមួយកម្ពុជាគ្រប់ពេលវេលា។ រដ្ឋាភិបាលល្មោភសង្គ្រាមមួយនេះ បានប្រើប្រាស់បញ្ហាព្រះវិហារដើម្បីបង្កើនប្រជាប្រិយភាពរបស់ខ្លួន។ នាយករដ្ឋមន្ត្រីអាភីស៊ីតដែលគាំទ្រដោយមេដឹកនាំរដ្ឋប្រហារយោធា និងក្រុមអាមាត្យក្នុងវាំង បានចាត់ទុកបញ្ហាព្រះវិហារថាជាចំណុចរសើបសម្រាប់ពលរដ្ឋថៃទូទៅ ហើយក៏បានបញ្ឆេះសង្គ្រាមតាមជាយដែនជាមួយកម្ពុជាយ៉ាងគឃ្លើន។
ទីបំផុត អ្នកសាបព្រួសខ្យល់ពិតជាទទួលបានព្យុះសង្ឃរាមែន។ តាមពិតអ្វីដែលរដ្ឋាភិបាលរបស់លោកអាភីស៊ីតបានគិតគឺសុទ្ធតែការស្រមើស្រមៃដ៏ខុសឆ្គងមួយ។ ពួកគេបានឃើញក្រុមជ្រុលនិយមអាវលឿងមួយដំបស្វាលោតនឹងស្មានតែពលរដ្ឋថៃទូទៅលោតដូចគ្នាដែរជុំវិញបញ្ហាព្រះវិហារ។ ប៉ុន្តែ មានអ៊ីចឹងឯណា ពលរដ្ឋថៃភាគច្រើនលើសលប់មិនបានសប្បាយចិត្តនឹងនយោបាយបង្កសង្គ្រាមជាមួយប្រទេសជិតខាងឡើយ។ ផ្ទុយទៅវិញ ពួកគេបានកើតក្តីក្តៅក្រហាយយ៉ាងខ្លាំងចំពោះនយោបាយអមិត្តជាមួយប្រទេសជិតខាងរបស់រដ្ឋាភិបាលក្រុងបាងកក។
លទ្ធផលនៃការបោះឆ្នោតកាលពីថ្ងៃអាទិត្យទី៣ កក្កដា បានបង្ហាញច្បាស់ដោយគ្មានមន្ទិលសង្ស័យឡើយអំពីបញ្ហានេះ។ ការបោះឆ្នោតទម្លាក់លោកអាភីស៊ីតពីតំណែងនាយករដ្ឋមន្ត្រីគឺជាការវិនិច្ឆ័យទោសនាយករដ្ឋមន្ត្រីរូបនេះយ៉ាងទាន់ហន់។ ការផ្តន្ទាទោសនេះស័ក្តិសមណាស់នឹងទោសកំហុសរបស់លោកអាភីស៊ីត ដែលបានធ្វើឲ្យប្រទេសថៃរងការអាម៉ាស់យ៉ាងខ្លាំងនិងជាច្រើនលើកនៅលើឆាកអន្តរជាតិ។ បរាជ័យក្នុងការបោះឆ្នោតរបស់គណបក្សប្រជាធិបតេយ្យបានធ្វើឲ្យមេដឹកនាំក្រុងបាងកកអាម៉ាស់មុខនិយាយលែងចេញ ហើយសុខចិត្តប្រកាសទទួលស្គាល់ឆន្ទៈអ្នកបោះឆ្នោតថៃ។
បរាជ័យនេះបានកើតឡើងផ្ទួនៗ និងទាន់ហន់បន្ទាប់ពីរដ្ឋាភិបាលលោកអាភីស៊ីតជួបក្តីអាម៉ាស់នៅលើឆាកអន្តរជាតិក្នុងកិច្ចប្រជុំគណៈកម្មាធិការបេតិកភណ្ឌពិភពលោកលើកទី៣៥ នៅទីក្រុងប៉ារីស ប្រទេសបារាំង ចន្លោះពីថ្ងៃទី១៩ ដល់ ២៩ មិថុនា។ នេះបានចំជាយីអ៊ុនដាក់ អារក្សធ្វើមែនសម្រាប់រដ្ឋាភិបាលលោកអាភីស៊ីត។ លោកអាភីស៊ីត មិនត្រឹមតែបាត់តំណែងនាយនាយករដ្ឋមន្ត្រីប៉ុណ្ណោះទេ តែអ្នកឈ្លានពានគេរូបនេះថែមទាំងបង្ខំចិត្តលាចេញពីតំណែងប្រធានគណបក្សប្រជាធិបតេយ្យទៀតផង។
តើនេះមិនមែនជាការត្រូវបណ្តាសាទេឬ? បារមីប្រាសាទព្រះវិហារពិតជាសក្តិសិទ្ធមែន។ ស័ក្តិសិទ្ធិរហូតដល់ធ្វើឲ្យអ្នកឈ្លានបានវិនាសយ៉ាងអាម៉ាស់។ នៅមិនទាន់ចប់នៅឡើយទេ តុលាការយុត្តិធម៌អន្តរជាតិក្រុងឡាអេនឹងប្រកាសសេចក្តីសម្រេចរបស់ខ្លួននៅថ្ងៃទី១៨ កក្កដា ខាងមុខដែលទំនងជាធ្វើឲ្យរដ្ឋាភិបាលចាំផ្ទះរបស់លោកអាភីស៊ីតអាម៉ាស់មួយកម្រិតទៀតក៏មិនដឹង។ នេះមិនទាន់រាប់បណ្តឹងសុំឲ្យបកស្រាយសាលក្រមឆ្នាំ១៩៦២ ឡើងវិញ ដែលតុលាការក្រុងឡាអេនឹងចាត់ការនៅពេលខាងមុខនេះផងទេ។
ដូច្នេះ ថៃល្មមភ្លឺភ្នែកហើយក្នុងរឿងនេះពីព្រោះថា នៅលើលោកយើងនេះពិតជាមានបណ្តាសាមែន ជាពិសេសប្រាសាទបុរាណរបស់ខ្មែរទាំងឡាយសុទ្ធតែមានបារមីការពារមិនឲ្យពួកឈ្លានពានបំពានយកតាមអំពើចិត្តនោះឡើយ៕
No comments:
Post a Comment