ដើមរាសី អ្នកខ្លះហៅដើមព្រះនាងគង់ស៊ីអ៊ីម ! តែភាគច្រើនវាត្រូវបានគេហៅថា ដើមឫស្សីផ្តល់សំណាង ( Lucky Bamboo) (Dracaena) រុក្ខជាតិតូចមួយនេះ ត្រូវបានគេស្គាល់ជាច្រើនសតវត្សរ៍មកហើយថា ជារុក្ខជាតិនាំយកសំណាងឲ្យចំពោះអ្នកដាំវា ។ តាមពិតទៅវាពុំមែនជាឫស្សីទេ គឺជារុក្ខជាតិថ្នាំងមួយកង់ៗ ដូចឫស្សីដែរ ទើបបានគេនាំគ្នាហៅថាជាឫស្សី ។
ដើមរាសីនេះត្រូវបានគេដឹងថាមានទំនាក់ទំនងច្រើនទៅនឹងក្បួនហុងស៊ុយរបស់ចិន, គេជឿថាដើមនេះជួយផ្តល់នូវធាតុឈើ និង ទឹក តែបើបានចងក្រណាត់បូក្រហមផង វានឹងជួយឲ្យធាតុភ្លើងមួយទៀតមកតុល្យភាពគ្នា ហូរចូលមកក្នុងបន្ទប់រស់នៅរបស់យើង ។
គេមានជំនឿទៀតថា ដើមរាសីនេះមិនត្រឹមតែមានទំនាក់ទំនងជាមួយជំនឿ ទៅលើហុងស៊ុយតែប៉ុណ្ណោះទេតែ ក៏ជាដើមរុក្ខជាតិផ្តល់សំណាងល្អផងដែរ ។ ក្រៅពីនេះវាត្រូវបានគេប្រើប្រាស់ធ្វើជាកាដូ សម្រាប់ជូនឲ្យគ្នាទៅវិញទៅមក នៅក្នុងទីផ្សារផងដែរ ។
ការយកដើមរាសីធ្វើជាកាដូ មិនត្រូវបានគេគិតថា ពេលណា ឬ ខែណា ទើបធ្វើបាននោះទេ គឺយើងអាចឲ្យជាកាដូ នៅពេលណាក៏បាន ។ ដោយហេតុថា ដើមរាសីនេះត្រូវបានគេដាំក្នុងទឹកក៏បាននោះ ជាហេតុធ្វើឲ្យគេអាចតុបតែងលំអវាទៅជាក្បាច់ក្បូរច្រើនបែបច្រើនយ៉ាងណាស់ សំរាប់លក់នៅក្នុងទីផ្សារស្ទើរគ្រប់ទីកន្លែងទូទាំងពិភពលោក ។
ការយករុក្ខជាតិនេះមកច្នៃប្រឌិត សម្រាប់លក់ធ្វើជាគ្រឿងនាំសំណាង អាចនិយាយបានថាជាមុខរបរមួយ អាចឲ្យយើងរកចំណូលបានបង្គួរដែរ បើយើងធ្វើវាបានស្អាតល្អ មានការតុបតែងគួរឲ្យទាក់ភ្នែកគេ (អ្នកទិញ) ។
នៅប្រទេសចិន ដូចជាហុងកុង សៀងហៃ និង តៃវ៉ាន់ ដើមរាសីនេះត្រូវបានគេតុបតែងលំអយ៉ាងស្អាត និង អាចលក់បានតម្លៃរហូតដល់រាប់រយដុល្លារក្នុងមួយថូ ។
បើយើងអាចកែច្នៃវាឲ្យបានល្អ ស្អាត និងលក់ក្នុងតម្លៃមួយសមគួរ ដែលគេអាចទិញបាននោះយើងនឹងមានទីផ្សារមួយជាប្រាកដ បើយើងអាចធ្វើវាបានក្នុងចំនួនច្រើន ហើយផ្ញើគេដាក់លក់តាមទីកន្លែងនានា ។
នេះគឺជាមុខរបរមួយដែលមិនសូវប្រើដើមទុនច្រើន តែមានលទ្ធភាពអាចពង្រីកបាន មានទីផ្សារធំទាំងនៅក្នុងប្រទេស និង ក្រៅប្រទេស ។
ដើមរាសីនេះជាប្រភេទរុក្ខជាតិដែលអាចរស់បានទាំងក្នុងទឹក និងដាំនៅដី សម្រាប់ការតុបតែងលំអគេច្រើនដាំវាក្នុងថូឬផើងដាក់ទឹក ។ ដោយហេតុថានេះជារុក្ខជាតិដែលមានការលូតលាស់យឺតៗ ដូច្នេះសូមកុំបារម្ភពីការលូតលាស់របស់វា បើសិនត្រូវបានថែទាំល្អវាអាចរស់បានរាប់សិបឆ្នាំទៅមុខ ។
នៅប្រទេសអាហ្វ្រិកដើមរាសីមានបែបសណ្ឋានផ្សេងខុសពីអ្វីដែលយើងធ្លាប់ឃើញនាពេលសព្វថ្ងៃ ប៉ុន្តែមិនសូវត្រូវបានគេស្គាល់ឡើយ តែផ្នែកខ្លះនៃពូជដែលនាំចូលមកពីអាហ្វ្រិកមានលក់នៅក្នុងប្រទេសខ្លះ នៅប្រទេសកម្ពុជាយើងក៏ឃើញមានច្រើន ហើយច្រើនបែបផង ។
មានពពួកពូជខ្លះត្រូវបានគេបង្កាត់ឲ្យមានពណ៌ផ្សេងៗតាមដែលគេចង់បាន ដោយលៃយ៉ាងណាឲ្យប្លែកភ្នែក ជួយទាក់ទាញចិត្តអ្នកទិញ ។
ចំពោះអ្នកលក់ដើមរាសីវិញ គាត់អាចពន្យល់យើងបានថា ដើមរាសីប្រភេទអ្វីខ្លះដែលល្អ ហើយត្រូវបានគេឲ្យឈ្មោះអ្វីខ្លះ ។
បើសិនយើងមានបំណងត្រឹមតែតុបតែងលំអ យើងអាចទិញវាច្រើនដើមរួចពត់ចងវាទៅជាអ្វីមួយដែលយើងចូលចិត្ត តែបើយើងមានបំណងលក់ដើមរាសីនេះ យើងត្រូវស្វែងយល់ពីវិធីតុបតែងវាឲ្យបានច្រើនបែបបន្តិច ឯចំណែកកែវ ថូ ចាន ដែលយើងប្រើសំរាប់
ដាំវានោះទៀតយើងក៏គួរតែរើសមើលឲ្យបានសមសួនផងដែរ ក្អមតូចៗ ថូធ្វើពីឥដ្ឋ កែវក្បាច់ គល់ឈើតូចៗល្មមសំបកដូង ត្រឡោកដូង ទាំងអស់នេះសឹងអាចប្រើការបានសម្រាប់ដាក់ដាំ និងជាគ្រឿងលំអ តែបើយើងមានបំណងតុបតែងច្រើនជាងនេះយើងគួរប្រើផើងធំៗ ដែលមានក្បាច់ក្បូរទើបជាការល្អ ។
* ការបណ្តុះ និងបំបែកដើមរាសីៈ
ដើមរាសីងាយដុះលូតលាស់ណាស់តែគ្រាន់តែប្រើពេលយូរបន្តិចអ្នកដាំដើមរាសីនេះលក់ បានប្រើប្រាស់ ការដាំលើដី គឺត្រូវធ្វើដីមួយកន្លែងទំហំតូច ឬធំទៅតាមការចូលចិត្ត ។ ជីកចុះទៅក្រោមឲ្យបានជម្រៅ ៥០សង្ទីម៉ែត្រ កាយយកអាចម៌ដីចេញឲ្យអស់ ដាក់ដីជីកំប៉ុស្តិ៍ ក្រាលបាតកម្រាស់ ១០សង្ទីម៉ែត្រ ដាក់ផេះអង្កាមកម្រាស់ ៥សង្ទីម៉ែត្រ ដាក់អាចម៌រណា កម្រាស់ ១០សង្ទីម៉ែត្រ ដាក់ជីកំប៉ុស្តិ៍ ឬកំទេចឈើពុកៗ កម្រាស់ ៥សង្ទីម៉ែត្រ បូមទឹកដាក់ចូលឲ្យលិចអ្វីៗដែលយើងបានដាក់នោះ នៅពេលទឹកនេះរីងអស់ត្រូវទុកចោលរយៈ
ពេលមួយសប្តាហ៍សិនបើមានឬ អាចរកស្ករកាកអំពៅបានគួរយកស្ករនេះមកលាយទឹក ក្នុងអត្រា ១លីត្រស្ករ (១Kg) លាយជាមួយទឹក ៥០លីត្រ កូរឲ្យសព្វរួចចាក់ ឬបាចឲ្យសព្វក្នុងរណ្តៅនោះ ដើម្បីបំប៉នដីនិងបណ្តុះបាក់តេរីល្អ ។
រកឫស្សីបន្ទះមួយចំនួនពុះច្រៀកជាពីរឬជាបី ប្រវែង ៧០cm ទៅ ១០០cm និងត្រៀមខ្សែខ្លះសម្រាប់ធ្វើជាចំណង ។
បន្ទាប់ពីមួយសប្តាហ៍បានកន្លងទៅ យើងត្រូវបាចទឹកឬដាក់ទឹកឲ្យច្រើនបន្តិចជាបន្ថែម ល្មមយើងអាចជាន់វាឲ្យបែកផុកបាន ។
ព្យាយាមដើរជាន់ដីនេះឲ្យបែកផុកតែមិនត្រូវឲ្យវារាវពេក ឬស្អិតពេកឡើយ ។ យករនាស់មករាស់បង្ក្រាបមុខលើឲ្យស្មើ ចែកផ្នែកក្រឡាវាដោយទុកចន្លោះ ៦០-៨០cm ក្នុងជួរនីមួយៗសម្រាប់ងាយដើរកាត់នៅពេលក្រោយ អូសខ្សែពីចុងម្ខាងទៅចុងម្ខាងទៀតហើយ
ចងចុងខ្សែទាំងសងខាងទៅនិងបង្គោល យកឈើឬ ដងចបជីក បុកចូលទៅក្នុងដីបង្កើតជារន្ធដាក់ដើមរាសីដែលបានកាត់ផ្នែកខាងចុងចេញហើយទុកតែប្រវែង ៣០ស.ម ដាក់ចូលក្នុងរណ្តៅនោះ ដោតបង្គោលឫស្សី យកខ្សែឬកៅស៊ូ ចងផ្អោបវាទៅនិងបង្គោលឫស្សី ធ្វើបែបនេះ
រហូតយើងអាចដាំអស់ដើមរាសីដែលយើងគ្រោងដាំ យើងអាចដាំវាជាបន្តបន្ទាប់ក៏បាន ។
បន្ទាប់ពីដាំរួចហើយ យើងត្រូវចិញ្ច្រាំចំបើងឲ្យខ្លីៗ យកមកលាយពីលើទីដាំនោះឲ្យបានកម្រាស់ ៥សង្ទីម៉ែត្រ រួចសាចទឹកដាក់រាល់ថ្ងៃ លៃធ្វើយ៉ាងណាកុំឲ្យដីនៅក្នុងរណ្តៅនោះស្ងួតឲ្យសោះ តែក៏មិនត្រូវឲ្យវាលិចដីនោះដែរ ។ ២ ទៅ ៤សប្តាហ៍ក្រោយយើងនឹងឃើញ
វាលាស់ចេញបំពង់ថ្មីជាច្រើនតាមដើមនីមួយៗដែលយើងបានដាំ (គួរធ្វើរបងឃាំងផងបើចាំបាច់) នៅពេលនេះយើងចាប់ផ្តើមបង្កើនចំនួនទឹកឲ្យបានច្រើនគឺធ្វើឲ្យទឹកលិចគល់របស់វា យើងអាចប្រើជីធម្មជាតិដូចជាស្លឹកកន្ធុំថេត ទន្ទ្រាំងខេត្រ លាយជាមួយជីលាមក គេផ្អាប់ទុករយៈ
ពេលមួយសប្តាហ៍រួចលាយជាមួយផេះអង្កាមដើរដាក់តាមជួររបស់វា ដើម្បីបំប៉នការលូតលាស់របស់វា ។
នៅពេលដើមរាសីមានកំពស់ ៦០-៨០cm ហើយយើងអាចបង្កើនការដាក់ជីនិង ស្រោចទឹកមួយសប្តាហ៍មុនពេលកាត់វាមកតុបតែងឬ យកទៅលក់ឲ្យគេ ពេលកាត់ត្រូវលៃទុកឲ្យបាន ២០cm ផ្នែកគល់ដើម្បីឲ្យលាស់បំពង់ថ្មីទៀត ។ នៅរាល់ពេលដែលយើងកាត់វា យើងត្រូវពបកំបោរនៅផ្នែកដែលបានកាត់ ឯដើមដែលកាត់ចេញមកមិនចាំបាច់លាបកំបោរវាទេ ។
ដើមរាសីដែលបានកាត់ចេញមកមិនត្រូវដាក់វាហាលថ្ងៃទេ ត្រូវលាយទឹកថ្នាំបណ្តុះឫស (មានលក់នៅផ្សារអូឫស្សី) មួយកម្របលាយទឹក ១០សង្ទីម៉ែត្រ ត្រាំវាចំនួន ២៤ម៉ោងទៅ ៤៥ម៉ោង មុនពេលយកមកដាក់ដាំកែវលំអ ហាមប្រើទឹកម៉ាស៊ីនត្រូវប្រើទឹកសុទ្ធ ឬទឹកភ្លៀង ឬទឹកម៉ាស៊ីន តែត្រូវទុកចោល ៤៨ម៉ោងសិន ។
ការថែទាំៈ
ដើមរាសីដែលដាំក្នុងថូដាក់ទឹកត្រូវប្តូរទឹកនោះចេញរាល់សប្តាហ៍ ទឹកត្រូវមានកំពស់ត្រឹមតែ ២៥mm ពីបាត ឬមួយថ្នាំងដៃពីបាតបានហើយមិនត្រូវដាក់ទឹកច្រើនពេកទេ មិនត្រូវដាក់ដើមរាសីត្រង់កន្លែងដែលមានពន្លឺថ្ងៃច្រើននោះទេ វាគឺជារុក្ខជាតិដែលត្រូវការពន្លឺក្នុងផ្ទះ
ក្នុងម្លប់តែមិនមែនពន្លឺចំណីព្រះអាទិត្យឡើយ ។
យើងអាចប្រើជីទឹកដាក់លាយជាមួយបើសិនមិនអាចរកទិញបានបើគ្មាន យើងអាចប្រើដុំថ្មតូចៗ ដាក់ត្រាំក្នុងទឹកដាំវានោះក៏បាន។
យើងអាចកាត់ដើមរាសីលក់ម្តងហើយម្តងទៀត តែដើម្បីឲ្យដើមនិងស្លឹករបស់វាដុះលូតលាស់ល្អគ្មានស្លឹកខ្លោច ឬស្លេកពណ៌ យើងគួរធ្វើដំបូល ឬបង្កើតម្លប់ឲ្យវា តែរក្សាយ៉ាងណាឲ្យមានពន្លឺគ្រប់គ្រាន់ ។
ចំពោះការតុបតែងជារូបរាងយ៉ាងណានោះសូមមើលតាមគំរូរូប ដែលមានដាក់ភ្ជាប់មកជាមួយនេះស្រាប់ ៕
No comments:
Post a Comment