Wednesday, August 8, 2012
ព័ត៌មានសុខភាពខ្លីៗ វគ្គ២តចប់
តើអ្វីដែលជាជំងឺផ្លូវដំណេក?
ប្រសិនបើ អ្នកមានបញ្ហាគេងមិនលក់ គេងឧស្សាហ៍ភ្ញាក់ គេងលក់ហើយតែមិនស្កប់ ឬក៏គេងប្រែខ្លួនជាញឹកញាប់នោះ មានន័យថា លោកអ្នកកំពុងតែប្រឈមនឹងបញ្ហាដំណេកហើយ។ ជួនកាលក៏មានមនុស្សមួយចំនួនកើតជំងឺផ្លូវដំណេក ដោយមិនដឹងខ្លួនផងដែរ ដោយសារតែរោគសញ្ញានៃជំងឺនេះគឺមានលក្ខណៈទូទៅ និងពិបាកកំណត់មូលហេតុវាឲ្យជាក់លាក់ណាស់។
តើគេងប៉ុន្មានម៉ោងទើបគ្រប់?
អ្នក ជំនាញផ្នែកដំណេកមិនអាចកំណត់ពីបរិមាណ ឬរយៈពេលនៃដំណេក ដែលល្អប្រសើរបំផុតចំពោះមនុស្សគ្រប់ៗរូបនោះទេ ដោយសារតែបុគ្គលម្នាក់ៗមានកត្តាសុខភាពផ្លូវកាយ កត្តាខួរក្បាល និងដំណើរការនៃប្រព័ន្ធសរីរាង្គខុសៗគ្នា។ ប៉ុន្តែជាទូទៅ វេជ្ជបណ្ឌិតណែនាំឲ្យមនុស្សធំពេញវ័យទទួលទានដំណេកចន្លោះពី៧ទៅ ៩ម៉ោងក្នុង១ថ្ងៃ។ យ៉ាងណាមិញ សម្រាប់មនុស្សមួយចំនួនដំណេក៥ទៅ៦ម៉ោងក្នុង១ថ្ងៃក៏អាចចាត់ទុក ថាគ្រប់គ្រាន់សម្រាប់ពួកគេដែរ។ យោងតាមវេជ្ជបណ្ឌិត ខារ៉ូល អាស មកពីរដ្ឋញូវជើស៊ី មនុស្សម្នាក់ៗត្រូវចាំបាច់សិក្សាពីវដ្ដដំណេកផ្ទាល់ខ្លួន និងចំនួនម៉ោងនៃការគេងដែលសមស្រប និងធ្វើឲ្យខ្លួនមានអារម្មណ៍ស្រស់ថ្លា។
តើការគេងច្រើនពេកល្អឬទេ?
ជាការ ពិតណាស់ មនុស្សម្នាក់ក៏អាចទៅជាឈឺដោយសារតែទទួលទានដំណេកច្រើនជ្រុលពេក ដែរ ព្រោះថា ការចំណាយពេលច្រើនគេងនៅលើគ្រែ អាចជាសញ្ញានៃជំងឺធ្លាក់ទឹកចិត្ត ឬជំងឺហេវហត់កម្រិតរ៉ាំរ៉ៃ។
តើកង្វះដំណេកនាំបញ្ហាអ្វីខ្លះ?
យោង តាមការសិក្សារបស់អង់គ្លេស កង្វះដំណេក ឬគេងតិចជាង៥ម៉ោងក្នុង១ថ្ងៃអាចមានការប៉ះពាល់ដល់សុខភាព ដូចជា ប្រឈមនឹងគ្រោះថ្នាក់ដោយជំងឺលើសឈាម និងជំងឺបេះដូង។ ជាងនេះទៅទៀត ការគេងមិនគ្រប់គ្រាន់ក៏អាចជាកត្តា ដែលបង្កើនអត្រាប្រឈមនៃជំងឺលើសទម្ងន់ ជំងឺទឹកនោមផ្អែម ជំងឺធ្លាក់ទឹកចិត្ត ការញៀនគ្រឿងស្រវឹង និងគ្រោះថ្នាក់ចរាចរណ៍ជាដើម។ ការសិក្សាមួយធ្វើឡើងដោយសាកលវិទ្យាល័យរដ្ឋកាលីហ្វ័រនីញ៉ា បានបង្ហាញថា កង្វះដំណេកនាំឲ្យប៉ះពាល់ដល់ផ្នែកសរីរាង្គខួរក្បាលដែលបញ្ជាផ្នែក ស្មារតី និងអារម្មណ៍។
តើអ្វីជាឱសថជំនួយដំណេក?
វេជ្ជបណ្ឌិត ភាគច្រើនណែនាំឲ្យប្រើថ្នាំម៉ាញេស្យូម២០០មិល្លីក្រាម និងកាល់ស្យូម៦០០មិល្លីក្រាម នៅពេលយប់មុនចូលដំណេក។ សារធាតុទាំងពីរនេះត្រូវបានគេស្គាល់ថា អាចជំរុញឲ្យដំណេកលក់ស្កប់ស្កល់។
ជាជំងឺរលាកសន្លាក់រ៉ាំរ៉ៃ?
ជំងឺរលាកសន្លាក់ រ៉ាំរ៉ៃ គឺជាជំងឺប្រព័ន្ធភាពស៊ាំក្នុងខ្លួនមនុស្សយើង ដែលបណ្តាលឲ្យមានការរលាកដល់សន្លាក់។ ជំងឺរលាកសន្លាក់រ៉ាំរ៉ៃក៏អាចធ្វើឲ្យរលាកជាលិកាដែលនៅជុំវិញ សន្លាក់ រួមទាំងសរីរាង្គផ្សេងៗទៀតផងដែរ ។ ជំងឺប្រព័ន្ធភាពស៊ាំ គឺជាជំងឺម្យ៉ាងដែលកើតឡើងនៅពេលដែលជាលិកាខ្លួនមនុស្សយើងធ្វើការ ខុសតួនាទី។ និយាយឲ្យសាមញ្ញទៅ គឺជាលិការបស់មនុស្សបែរជាច្រឡំធ្វើការវាយប្រហារទៅលើប្រព័ន្ធ ស៊ាំរបស់ខ្លួនឯងទៅវិញ។
តើវាមានរោគសញ្ញាអ្វីខ្លះ?
ជំងឺ រលាកសន្លាក់រ៉ាំរ៉ៃអាចរស់នៅជាមួយនឹងអ្នកជំងឺបានយូរអង្វែង ដែលធ្វើឲ្យអ្នកជំងឺជួបប្រទះនូវបទពិសោធ និង រោគសញ្ញាច្រើនក្រាស់ក្រែលផងដែរ។ ទោះបីជាយ៉ាងណាក៏ដោយជំងឺរលាកសន្លាក់រ៉ាំរ៉ៃអាចធ្វើឲ្យខូចខាតដល់ សន្លាក់ទាំងស្រុង និងអាចឈានទៅរកពិការភាពទៀតផង។ សន្លាក់គឺជាកន្លែងដែលឆ្អឹងពីរជួបប្រសព្វគ្នា ដើម្បីអាចធ្វើចលនាបាន ។ ការរលាកសន្លាក់ អាចបណ្តាលឲ្យសន្លាក់ ហើម ឈឺចាប់ តឹង និងក្រហម។ ការរលាកសន្លាក់អាចកើតមានទៅលើជាលិកានានានៅជុំវិញសន្លាក់នោះ ដូចជា សរសៃពួរ សរសៃចង និង សាច់ដុំ។
អ្នកណាខ្លះអាចកើតជំងឺនេះ?
ជំងឺ នេះកើតលើស្ត្រីបីដងច្រើនជាងបុរស ដោយមិនប្រកាន់ពូជសាសន៍ឡើយ។ ជំងឺរលាកសន្លាក់រ៉ាំរ៉ៃអាចកើតលើមនុស្សគ្រប់វ័យ សូម្បីតែក្មេងៗក៏ដោយ ប៉ុន្តែជាធម្មតាច្រើនកើតលើមនុស្សដែលមានវ័យចន្លោះពី ៤០ ទៅ ៦០ ឆ្នាំ។ តាមរបាយកាណ៍ពីអង្គការសុខភាពពិភពលោក១ភាគរយនៃចំនួនប្រជាជនសរុប ក្នុងពិភពលោក ដែលស្មើនឹង៧០លាននាក់ កំពុងប្រឈមនឹងជំងឺសន្លាក់នេះ។ មកទល់សព្វថ្ងៃ គ្មានការសិក្សាណាមួយដែលអាចបញ្ជាក់ថា ជំងឺសន្លាក់រ៉ាំរ៉ៃបណ្ដាលមកពីកត្តាហ្សែនតំណពូជនោះឡើយ។
គួរធ្វើអ្វីខ្លះពេលកើតជំងឺនេះ?
អ្នក កើតជំងឺសន្លាក់គួរតែចៀសវាងអាហារដែលសម្បូរជាតិខ្លាញ់ ដូចជា សាច់ជ្រូកបីជាន់ សាច់គោ ប៊័រ និងក្រែម ដោយសារធាតុទាំងនេះមានផ្ទុកនូវជាតិ prostaglandins ជាដើមទងនាំឲ្យមានអាការរលាក ហើម និងឈឺចាប់នៅត្រង់សន្លាក់។ ដូច្នេះហើយ បានជាអ្នកជំងឺសន្លាក់មួយចំនួនជ្រើសរើសរបបអាហារតមសាច់ និងញ៉ាំតែបន្លែ។ កត្តាដែលអ្នកកើតជំងឺសន្លាក់គួរតែចៀសវាងទៀតនោះ គឺការធ្វើចលនាហួសកម្លាំង និងការអង្គុយស្ងៀមនៅមួយកន្លែងដោយមិនធ្វើចលនាទាល់តែសោះ៕
Subscribe to:
Post Comments (Atom)
No comments:
Post a Comment