មុនពេលគេងត្រូវរៀបរយ ដើម្បីភាពស្អាត និងស្រស់ស្រាយនាពេលព្រឹក
ចង់បានភាពស្រស់ស្រាយ ស្បែកភ្លឺថ្លានាពេលព្រឹកព្រលឹម បន្ទាប់ពីភ្ញាក់ពីដំណេកដែរ ឬទេមិត្តអ្នកអានទាំងឡាយ? បើចម្លើយរបស់អ្នក គឺចង់បាននោះ សូមត្រៀមខ្លួនឱ្យបានរួចជាស្រេច នាពេលយប់មុនពេលចូលដំណេកដូចខាងក្រោម៖
ផ្តល់ភាពស្រស់ស្អាត ដល់ស្បែក
រឿងទីមួយដែលអ្នកត្រូវធ្វើមុនគេ នាពេលយប់មុនពេលចូលដំណេកនោះគឺ ការលាងសម្អាតផ្ទៃមុខឱ្យបានស្អាតល្អ។ ដូចដែលអ្នកធ្លាប់បានដឹងហើយថា រយៈពេលពេញមួយថ្ងៃ ដែលអ្នកបានធ្វើសកម្មភាពផ្សេងៗ គឺជាពេលវេលាដែលល្អបំផុតសម្រាប់ធូលីដី និងពពួកមេរោគផ្សេងៗ មានឱកាសបានមកតោងជាប់នៅលើស្បែករបស់អ្នក ដើម្បីបង្កផលប៉ះពាល់ផ្សេងៗ នៅលើស្បែក ហេតុដូច្នេះវិធី ដែលងាយបំផុតក្នុងការកម្ចាត់សត្រូវនៃសម្រស់នេះ មានតែការលាងសម្អាតស្បែកឱ្យបានស្អាតនេះឯង។ សូមចាំទុកថា ជាតិក្រែមម្សៅ ជាតិខ្លាញ់ ញើស ធូលី ឬ គ្រឿងសម្អាងដែលដិតជាប់លើផ្ទៃមុខរបស់អ្នក ពេញមួយយប់ គឺជាសត្រូវនៃស្បែកស្រស់ស្អាត។
កម្លាំងជំនួយ
ជំហានបន្ទាប់មកទៀត គឺការបន្ថែមវីតាមីនទៅឱ្យស្បែកនាពេលយប់ ដើម្បីភាពទន់ភ្លឺថ្លាស្រស់ស្រាយនាពេលព្រឹកព្រលឹម។ បច្ចុប្បន្ននេះផលិតផល ដែលមានគុណភាពខ្ពស់មានច្រើនប្រភេទណាស់នៅលើទីផ្សារ ដូច្នេះ ទំនេីប គិតថា គ្រាន់តែចង់បានផលិតផលមួយដែលសម្បូរទៅដោយវីតាមីនដើម្បីចិញ្ចឹម និងថែរក្សាស្បែកឱ្យតឹងណែននោះ ប្រហែលជាមិនមែនជារឿងដែលពិបាកណាស់ណានោះទេ។ អនុវត្តការបន្ថែមវីតាមីន ប្រូតេអីុន និងសារធាតុសំខាន់ផ្សេងៗ ដល់ស្បែកជារៀងរាល់យប់មុនពេលចូលដំណេក ហើយមិនយូរទេអ្នកពិតជាបានដឹងថា ពពួកសារធាតុអស់ទាំងនោះ មានប្រយោជន៍យ៉ាងណាចំពោះស្បែករបស់អ្នក។
រង្វង់ភ្នែកផង!
ចាត់ការរឿងថ្ពាល់ ថ្ងាស ច្រមុះ និងចង្ការរួចស្រេចហើយ ដូច្នេះចំណុចបន្ទាប់ដែលត្រូវតាមមកទៀតនោះគឺ រង្វង់ភ្នែក។ ដូចដែលអ្នកបានដឹងហើយថា រង្វង់ភ្នែកភ្លឺថ្លា គឺជាមន្តស្នេហ៍មួយផ្នែកទៀតរបស់នារីយើង ហេតុនេះការដែលធ្វើឱ្យស្បែកនាបរិវេណរង្វង់ភ្នែកមានភាពភ្លឺថ្លានោះ ក៏ចាំបាច់ណាស់ដែរ។ ការបិទចំណិតត្រសក់ ដំឡូងបារាំង ឬថង់កាកតែនៅលើត្របកភ្នែកវាជារឿងសាមញ្ញក៏ពិតមែន ប៉ុន្តែ ទំនេីប ជឿថាវាពិតជាមិនមានភាពងាយស្រួលក្នុងការធ្វើទេ សម្រាប់ពេលយប់ ព្រោះថាអ្នកប្រាកដជាត្រូវប្រែខ្លួនទៅឆ្វេងបន្តិចស្តាំបន្តិច ធ្វើឱ្យវាងាយនឹងជ្រុះបាត់ ពីលើត្របកភ្នែកដោយមិនដឹងខ្លួន។ ចំពោះរឿងបែបនេះអ្នកត្រូវស្វែងរកជំនួយពីក្រែម ដែលផលិតឡើងសម្រាប់លាបលើបរិវេណរង្វង់ភ្នែក។ ក្រែមលាបត្របកភ្នែក ឬសេរ៉ូមដែលមានវីតាមីនច្រើន រួមជាមួយនឹងជាតិសំណើមផងនោះ នឹងជួយធ្វើឱ្យស្បែកត្របកភ្នែករបស់អ្នកភ្លឺថ្លាស្រស់ស្រាយជាមិនខាន។
ប្រយ័ត្នខ្នើយកើយ!
គ្មានអ្នកណាប្រាកដចិត្តបានទាំងស្រុងទេថា ខ្លួនឯងនឹងគេងត្រង់តែមួយកន្លែងមិនផ្អៀងទៅ ឱ្យផ្ទៃមុខប៉ះនឹងខ្នើយទាល់តែសោះនោះទេ ព្រោះតែបែបនេះហើយទើបបានជា ទំនេីប ចង់ដាស់អារម្មណ៍អ្នកឱ្យប្រយ័ត្ន ចំពោះខ្នើយដែលអ្នកកើយបន្តិច។ ទោះជាយ៉ាងណាសូមដឹងទុកផងចុះថា ខ្នើយកើយដែលពេញទៅដោយភាពកខ្វក់ ក៏ជាកត្តាតូចមួយដែលនាំឱ្យស្បែកមុខរបស់អ្នកមិនស្រស់ស្អាតផងដែរ។
គេងឱ្យស្រួល
នៅពេលដែលអ្នកគេងផ្កាប់មុខ គេងចំហៀងរហូតពេញមួយយប់នោះធានាថា អ្នកនឹងបានទទួលលទ្ធផលភ្លាមៗ នាពេលព្រឹកព្រលឹមឡើងជាមិនខាន ហើយលទ្ធផលនោះ គឺប្រាកដជាមិនមានអ្វីផ្សេងក្រៅពីស្នាមជ្រួញ នៅលើផ្ទៃមុខនោះទេ។ ចំពោះដំណោះស្រាយនៃបញ្ហានេះគឺ ព្យាយាមធ្វើយ៉ាងណាគេងផ្អៀង ឱ្យបានតិចបំផុតតាមដែលអាចធ្វើទៅបាន។
គេងលក់ឱ្យស្រួល
គេងមិនលក់ គេងមិនស្កប់ ងាយនឹងធ្វើឱ្យភ្នែកឡើងខ្មៅ និងស្បែកស្រអាប់ខ្លាំងណាស់។ ស្វែងរកវិធីដែលអាចធ្វើឱ្យអ្នកគេងលក់ដោយខ្លួនឯង ហើយបន្ទាប់ពីនោះពេលព្រឹកព្រលឹមឡើង នឹងមានភាពប្រសើរឡើងជាមិនខាន។
ទាំងអស់ខាងលើនេះ គឺជាវិធីជួយឱ្យស្បែកមុខរបស់អ្នកភ្លឺថ្លានាពេលព្រឹក ប៉ុន្តែសូមកុំភ្លេចមើលថាស្បែកដៃជើង និងដងខ្លួនរបស់អ្នកផងណា៕
No comments:
Post a Comment