បុរសជនជាតិស្រីលង្កាម្នាក់បានស្លាប់ក្រោយពីព្យាយាមបង្កើតឯតទគ្គកម្មពិភពលោក«កប់ខ្លួនទាំងរស់ក្នុងដីរយៈពេលយូរ» ។ ប៉ូលិសបង្ហើបឱ្យដឹងថា លោកចាណាកា បាស្នាយ៉ាកេ អាយុ២៤ឆ្នាំ បានកប់ខ្លួននៅក្នុងដី កាលពីចុងសប្តាហ៍កន្លងមក ដោយការកប់នោះមានបន្ទះក្តារដាក់បាំងដីកប់ពីលើការពារកុំឱ្យកម្ទេចដីធ្លាក់លើដែលហេតុការណ៍កើតឡើងនៅទីក្រុងកាន់ថាឡេ ឆ្ងាយពីទីក្រុងកូឡាំបូ ភាគខាងជើងប្រហែល២២០គីឡូម៉ែត្រ ខណៈពេលទីភ្នាក់ងារព័ត៌មានក្នុងស្រុកបញ្ជាក់ថា ជម្រៅរណ្តៅខាងលើប្រហែល៣ម៉ែត្រ ។
លោកបាស្នាយ៉ាកេ បានកប់ខ្លួនកាលពីវេលាម៉ោង៩ និង៣០នាទីព្រឹកថ្ងៃទី៣ មីនា ហើយ រូបរាងរបស់គាត់ត្រូវយកឡើងមកខាងលើវិញនៅម៉ោង៤រសៀលក្នុងថ្ងៃខាងលើ ដោយមានសភាពសន្លប់បាត់ស្មារតី និងត្រូវបានបញ្ជូនទៅកាន់មន្ទីរពេទ្យ តែស្លាប់នៅពេលបន្ទាប់ ។ គ្រូពេទ្យបញ្ជាក់ថា លទ្ធផលការធ្វើកោសល្យវិច័យលើសពក្នុងដំណាក់កាលដំបូងមិនអាចបញ្ជាក់បានថា គេស្លាប់ដោយមូលហេតុអ្វីនៅឡើយទេ និងនៅតែបន្តការត្រួតពិនិត្យបន្ថែមទៀត ។
ចំណែកលោកស្រី អេល ឌីលីឡាវ៉ាទី ជាម្តាយរបស់ជនរងគ្រោះបង្ហើបឱ្យដឹងថា កូនប្រុសរបស់គាត់តែងតែចូលចិត្តប្រលែងលេងនឹងរឿងប្រថុយប្រថានតាំងពីនៅកុមារភាព និងសាកល្បងប្រតិបត្តិលើរឿងចម្លែកៗ ក្រោយពីបានទស្សនាខ្សែភាពយន្ត ។ កាសែត Lankadeepa បានចុះផ្សាយដោយយោងលើសម្តីរបស់លោកស្រីដែលអះអាងថា ក្នុងអំឡុងពេលមុននេះ កូនប្រុសរបស់គាត់ធ្លាប់ត្រូវកប់ទាំងរស់ចំនួន២លើករួចមកហើយ ដោយលើកដំបូងមានរយៈពេលប្រហែល២ម៉ោង និង៣០នាទី និងលើកទី២មានរយៈពេល៦ម៉ោង ។
បច្ចុប្បន្ន នៅមិនទាន់ដឹងច្បាស់ថា តើបានបង្កើតឯតទគ្គកម្មពិភពលោក ក្នុងការកប់ខ្លួនទាំងរស់រយៈពេលយូរ ឬអត់? ខណៈពេលសមត្ថកិច្ចប៉ូលិសបង្ហើបឱ្យដឹងថា លោកបាស្នាយ៉ាកេជាសមាជិករបស់ក្រុមកងជីវពល ដោយឆ្លងកាត់ក្នុងសង្គ្រាមស៊ីវិលស្រីលង្កា ៕
No comments:
Post a Comment