ទីភ្នាក់ងារព័ត៌មានបរទេសបានផ្សាយពីលទ្ធផលស្រាវជ្រាវរបស់«លីហ្វវីងសូសៀល»បង្ហើបឱ្យដឹងថា ជនជាតិអាមេរិកជាប់ចំណាត់ថ្នាក់ជាភ្ញៀវទេសចរដ៏អាក្រក់បំផុតលើលោក បន្ទាប់មកគឺជនជាតិចិន ។ ពាក្យអះអាងខាងលើនេះ បានផ្តល់នូវហេតុផលថា ជនជាតិអាមេរិករមែងតុបតែងខ្លួនគ្មានរបៀបរៀបរយ និងនិយាយស្តីដោយសំឡេងឮកងរំពងធ្វើឱ្យប៉ះពាល់ដល់អ្នកដទៃ ។
គួរបញ្ជាក់ថា តាមការអង្កេតលើភ្ញៀវទេសចរចំនួន៥.៦០០នាក់នៅទូទាំងពិភពលោក ភាគច្រើនសម្លឹងឃើញថា ជនជាតិអាមេរិកជាភ្ញៀវទេសចរដ៏អាក្រក់បំផុតដូចជា ប្រើឥរិយាបថមិនសមរម្យ តុបតែងខ្លួនមិនគប្បី ពោលគឺស្លៀកពាក់អាវរងាក្រាស់ ខោខូវប៊យ មួកខូវប៊យ ស្បែកជើងប៉ាតា រួមទាំងមានការនិយាយស្តីក្នុងសំឡេងខ្លាំងធ្វើឱ្យរំខានគេឯង និងយករបស់ប្រើប្រាស់ក្នុងសណ្ឋាគារត្រឡប់ទៅលំនៅឋានវិញ ។
ប្រសិនបើបែងចែកតាមការយល់ឃើញរបស់ជនជាតិនីមួយៗនៅលើពិភពលោក គឺជនជាតិអាមេរិកសម្លឹងឃើញថា ជាភ្ញៀវទេសចរអាក្រក់បំផុត ។ ចំណែកជនជាតិអៀកឡង់យល់ថា ជនជាតិអង់គ្លេសអាក្រក់បំផុត ខណៈពេលជនជាតិអង់គ្លេសមិនចូលចិត្តភ្ញៀវទេសចរជនជាតិអាល្លឺម៉ង់ ។ រីឯជនជាតិចិន ជប៉ុន បារាំង និងរុស្ស៊ីក៏ជាប់ក្នុងលំដាប់ថ្នាក់ភ្ញៀវទេសចរអាក្រក់ដូចគ្នា ខណៈពេលភ្ញៀវទេសចរឆ្នើមបំផុតរួមមានជនជាតិហូឡង់ អៀរ៍ឡង់ ស្វ៊ីស និងអូស្ត្រាលី ៕
No comments:
Post a Comment