ប្រភពពីដេលីម៉េល កាលពីថ្ងៃទី២៨ កុម្ភៈ បានបង្ហាញគូស្នេហ៍ជនជាតិឥណ្ឌា១គូ ដោយភាគីបុរសកើតជំងឺដុះសាច់ ឬសាច់ពកនៅពាសពេញដងខ្លួន ប៉ុន្តែភាគីខាងស្ត្រីជាប្រពន្ធមិនស្អប់ខ្ពើម សុខចិត្តរួមរស់ជាមួយគ្នាដោយបង្កើតបានកូនប្រុស៣នាក់ ។ អ្នកកើតជំងឺសាច់ពក ឬដុះសាច់ គឺលោកម៉ូហាម៉ាត់ អ៊ូម៉ា អាយុ៦២ឆ្នាំ ជាអ្នកស្រុករស់នៅក្នុងទីក្រុងហាយដឺរ៉ាបាត ប្រទេសឥណ្ឌា បង្ហើបឱ្យដឹងថា គាត់ចាប់ផ្តើមដុះសាច់តាំងពីអាយុ១៤ឆ្នាំ ក្រោយមកក៏រីករាលដាលពាសពេញរាងកាយដោយមានដុះសាច់រដិបរដុប ពេលគេឃើញខ្លាច និងស្អប់ខ្ពើម ហើយគ្រូពេទ្យបញ្ជាក់ថា ប្រសិនបើរៀបការមានកូនៗនោះក៏អាចកើតរោគស្រដៀងគ្នានេះដែរ ។
លុះនៅពេលឈានដល់អាយុ២៨ឆ្នាំគាត់បានជួបនាងហ្វាហាន់ អាន់នីសា ដែលយល់ព្រមរៀបការដោយភាគីខាងស្រីមិនស្អប់ខ្ពើមខ្លួនប្រាណអបលក្ខណ៍គាត់ឡើយ ព្រោះដឹងថាគាត់ជាមនុស្សល្អ ។ នាងហ្វាហាន់ ថ្លែងថា «ខ្ញុំមានអារម្មណ៍ថាលោកអ៊ូម៉ាជាបុរសដ៏ល្អ មានចិត្តគំនិតល្អទើបខ្ញុំជ្រើសរើសគាត់ធ្វើជាស្វាមី ទោះបីក្រុមគ្រួសារខ្ញុំក្រើនរំលឹកថា ទៅថ្ងៃអនាគតអាចពិបាកជាងនេះ ប្រសិនបើជំងឺសើរស្បែករបស់ប្តីកាន់តែអាក្រក់ជាងនេះ រួមទាំងទៅពិគ្រោះជាមួយគ្រូពេទ្យជំនួសខ្ញុំ ប៉ុន្តែខ្ញុំសម្រេចចិត្តជ្រើសរើសយកគាត់ដដែល»។
ក្រោយមកអ្នកទាំង២សម្រេចចិត្តមានកូន ជាសំណាងល្អកូនៗដែលកើតមកមានសុខភាពមាំមួន មិនបានទទួលផលប៉ះពាល់ណាមួយដល់ពួកគេឡើយ ។ ជំងឺខាងលើហៅថា NEUROFIBROMATOSIS (NF) កើតឡើងដោយការខុសប្រក្រតីរបស់ហ្សែន (Gene) ដូច្នេះវាអាចឆ្លងបន្តពីឪពុកម្តាយទៅកូន ដោយសារតែកោសិកាពូជបង្ហាញនៅលើស្បែក ។ ជាដំបូងនឹងមានស្នាមជាំ ក្រោយមកក៏កើតជាការដុះដុំពក ឬសាច់ពកនៅលើស្បែកដោយគ្មានថ្នាំព្យាបាល ទោះបីជាត្រូវធ្វើការវះកាត់ ឬបាញ់កាំរស្មីឡាស៊ែរក៏ដោយ ។
លោកអ៊ូម៉ា ថ្លែងថា ក្នុងមួយជីវិតនេះ ប្រសិនបើគ្មានប្រពន្ធម្នាក់នេះ លោកមិនដឹងថាខ្លួនឯងនឹងទៅជាយ៉ាងណាឡើយ? ប្រពន្ធគឺជាព្រះដែលជួយប្រោសព្រំជីវិតលោកឱ្យមានរស្មី ៕
No comments:
Post a Comment