ប្រទេសថៃបានសន្យាកាលពីថ្ងៃចន្ទ ទី២៩ ថា នឹងបិទទ្វារកាស៊ីណូខុសច្បាប់ បន្ទាប់ពីមានអ្នក នយោបាយបានចោទប្រកាន់មន្ត្រីប៉ូលិសជាន់ខ្ពស់ជាម្ចាស់កាស៊ីណូនៅកណ្តាលទីក្រុងបាងកកនោះរួចមក។ លោក Chuvit Kamolvisit សមាជិកសភា កាលពីសប្តាហ៍មុន បានបង្ហាញពីខ្សែវីដេអូឃ្លីបក្នុងសភា បន្ទាប់ពីខ្សែវីដេអូនេះត្រូវបានគេថតនៅក្នុងកាស៊ីណូ Rama IX ស្ថិតនៅលើផ្លូវមួយចំកណ្តាលបេះដូងរាជធានីបាងកក។
សមាជិកសភាដដែលបានសារភាពថា ខ្លួនធ្លាប់ធ្មេចភ្នែកស៊ីសំណូកជាមួយអាជ្ញាធរកាលពីពេលមុនក៏បាននិយាយរិះគន់ រដ្ឋាភិបាលលោកស្រីយីងឡាក់ ស៊ីណាវ៉ាត្រា ដែលខកខានក្នុងការដោះស្រាយបញ្ហា។ លោកឧបនាយករដ្ឋមន្ត្រី Chalerm Yubumrung បាននិយាយកាលពីថ្ងៃចន្ទថា បានចំណាយពេលវេលាជាមួយឆ្នាំ ដើម្បីប្រមូលឯកសារពីកាស៊ីណូតាំងតែពីពេលគណបក្សរបស់គាត់ជាបក្សប្រឆាំងមកម៉្លេះ។
គាត់បាននិយាយប្រាប់អ្នកសារព័ត៌មានថា មិនត្រឹមតែកាស៊ីណូ Rama IX ទេ ប៉ុន្តែមានកាស៊ីណូជាច្រើនទៀតនឹងត្រូវបិទដំណើរការ។ គាត់បន្តថា មន្ត្រីជាន់ខ្ពស់ចំនួនពីររូបត្រូវបានតែងតាំងក្នុងយុទ្ធនាការណ៍ចុះបង្ក្រាប ហើយប៉ូលិសសាលាក្រុងស្នើសុំឲ្យមានទីភ្នាក់ងារផ្សេងដូចជាប៉ូលិសល្បាតតាមព្រំដែនជាអ្នក ធ្វើកិច្ចការនោះ។
គណបក្សលោកChuvit ទទួលបាន៤កៅអីក្នុងសភា និងបានសន្យាប្រយុទ្ធប្រឆាំងអំពើពុករលួយ។ គាត់បាននិយាយក្នុងពេលផ្តល់បទសម្ភាសន៍ជាមួយសារព័ត៌មានAFP កាលពីខែ មិថុនា ថា ខ្ញុំជាមនុស្សផ្ទៃក្នុង ខ្ញុំដឹងពីរបៀបចាយលុយ។ ខ្ញុំចេះពីរបៀបសីុសំណូក។ គាត់បន្តថា អ្នកដឹងទេ បញ្ហាអំពើស៊ីសំណូកក្នុងប្រទេសថៃ គឺធ្ងន់ធ្ងរជាងការគិតរបស់មនុស្សគ្រប់គ្នាទៅទៀត ប៉ុន្តែគ្មាននរណាម្នាក់ចង់ឃើញការពិតឡើយ៕
No comments:
Post a Comment