ប្រភពពីបណ្តាញព័ត៌មានចិនបានឱ្យដឹងពីរឿងរ៉ាវដ៏ចម្លែកមួយ គឺមេខ្លាឃ្មុំខ្មៅមួយក្បាលបានជួយសង្គ្រោះកូនរបស់វាដែលរងការធ្វើទារុណកម្មដ៏ព្រៃផ្សៃដោយការចិញ្ចឹមយកទឹកប្រមាត់ពីសំណាក់ម្ចាស់កសិដ្ឋាន ដោយរើបម្រះចេញពីទ្រុង និងរត់សំដៅទៅរកកូនទាំងក្តីអាណិតអាសូរ រួចក៏សម្លាប់កូនរបស់វា ហើយក្រោយមកមេខ្លាឃ្មុំនោះក៏សម្លាប់ខ្លួនឯងដែរ។
ខ្លាឃ្មុំខ្មៅនេះត្រូវបានគេយកមកចិញ្ចឹមនៅក្នុងកសិដ្ឋានមួយស្ថិតនៅឆ្ងាយដាច់ស្រយាលនាភាគពាយ័ព្យប្រទេសចិន និងត្រូវបានគេដាក់នៅក្នុងទ្រុងដ៏តូចចង្អៀតមួយដែលមិនអាចរើបម្រះរួច ហើយត្រូវគេវះចោះ ដើម្បីយកទឹកប្រមាត់ និងទឹកក្រពះជាប្រចាំ សម្រាប់យកមកកែច្នៃធ្វើថ្នាំកែរោគនៅក្នុងឱសថបុរាណចិន (TCM : Traditional Chinese Medicine)។
តាមសាក្សីម្នាក់ដែលឃើញហេតុការណ៍នេះបានរៀបរាប់ប្រាប់ Reminbao.com ថា ម្ចាស់កសិដ្ឋាននោះជាមនុស្សគ្មានក្តីអាណិតអាសូរដល់សត្វសូម្បីតែបន្តិចណាសោះ។ គាត់បានឃើញមេខ្លាឃ្មុំនោះព្យាយាមវាយបំបាក់ទ្រុងនៅពេលឮសូរកូនរបស់វាស្រែកថ្ងូរគួរឱ្យឈឺចាប់បំផុត ដោយសារកម្មករចាក់ទម្លុះពោះរបស់វា ដើម្បីបូមយកទឹកប្រមាត់។ គាត់បានបន្តថា ខណៈពេលកំពុងធ្វើទារុណកម្មលើកូនខ្លាឃ្មុំនោះ គាត់បានឃើញក្រុមកម្មករនាំគ្នារត់ទាំងភ័យខ្លាចបំផុត នៅពេលឃើញមេខ្លាឃ្មុំនោះទម្លាយទ្រុងដែករត់មកជួយកូនរបស់វា។ ដោយសារតែការពារកូនឱ្យរួចផុតពីការធ្វើទារុណកម្ម មេខ្លាឃ្មុំនោះបានមកឱបកូនទាំងក្តីអាណិត ហើយក៏ខាំសម្លាប់កូននោះទៅ។ បន្ទាប់មក មេរបស់វាក៏រត់លោតហក់ទៅបុកជញ្ជាំងសម្លាប់ខ្លួនឯងដែរ។
គ្រូពេទ្យបុរាណចិនភាគច្រើន បានប្រកាសមិនប្រើទឹកប្រមាត់ខ្លាឃ្មុំក្នុងការផ្សំថ្នាំសម្រាប់ព្យាបាលនោះទេ ខណៈដែលមានរុក្ខជាតិជាច្រើនមានតម្លៃថោកសម្រាប់ប្រើជំនួសទឹកប្រមាត់ខ្លាឃ្មុំបាន។ គួរបញ្ជាក់ថា ទឹកប្រមាត់ខ្លាឃ្មុំត្រូវបានគេប្រើសម្រាប់បន្ថយកម្តៅនៅក្នុងខ្លួន ក៏ដូចជាសម្រាប់ព្យាបាលជំងឺថ្លើម និងជំងឺឈឺភ្នែកជាដើម៕
No comments:
Post a Comment