ជន​រងគ្រោះ​ពី​ការ​រំលោភ ព្យួរ​ក និង​ដុត​សម្លាប់

នារី​ជន​ជាតិ​អ៊ុយក្រែន​ម្នាក់​វ័យ ១៨ ឆ្នាំ ដែល​ត្រូវ​គេ​ចាប់​រំលោភ​ជា​ក្រុម ព្យាយាម​ព្យួរ​ក​សម្លាប់ ច្រក​ស្បោង ​និង​ដុត​សម្លាប់ កាល​ពី​ថ្ងៃ​ទី ៩ ខែ​មីនា កន្លង​ទៅ​នេះ ឥឡូវ​នេះ​​ស្លាប់​ហើយ បន្ទាប់​ពី​នាង​បាន post វីដេអូ​តាម online លាត​ត្រដាង​ពី​ទុក្ខវេទនា​របស់​នាង។ នេះ​បើ​យោង​តាម​គេហទំព័រ The Daily Mail
ចុះ​ផ្សាយ​កាល​ពី​ម្សិល​មិញ​នេះ។នាង Oksana Makar មាន​ភាព​ក្លាហាន​រៀប​រាប់​ប្រាប់​ទាំង​នាង​នៅ​លើ​គ្រែ​មន្ទីរ​ពេទ្យ ថា​តើ​នាង​ត្រូវ​បុរស​ទាំង ៣ នាក់​រំលោភ ព្យួរ​ក និង​ដុត​សម្លាប់​ដោយ​របៀប​ណា ដែល​ក្នុង​ការ​វាយប្រហារ​បែប​នេះ​ខ្លួន​នាង​មាន​របួស​រលាក​ស្បែក​រហូត​ដល់ ៥៥% ត្រូវ​កាត់​ដៃ​ស្ដាំ និង​ជើង​ទាំង​ពីរ បន្ទាប់​ពី​បញ្ជូន​មក​ពី​មន្ទីរ​ពេទ្យ។
ប៉ុន្តែ រយៈ​ពេល​ពីរ​សប្ដាហ៍​ក្រោយ​មក បុគ្គលិក​មន្ទីរ​ពេទ្យ​នៅ​ទីក្រុង Donetsk និយាយ​ថា នាង​បាន​ស្លាប់​ហើយ ដោយ​សារ​ការ​រលាក​ខ្លាំង​ពេក និង​ខូច​សួត។
ទង្វើ​នេះ បាន​ធ្វើ​រង្គោះ​រង្គើ​ពេញ​ប្រទេស​អ៊ុយក្រែន ដោយសារ​ភាព​សាហាវ​ឃោរឃៅ និង​មាន​បាតុកម្ម​ទូទាំង​ប្រទេស​ផង​ដែរ​ប្រឆាំង​នឹង​អំពើ​ពុករលួយ បន្ទាប់​ពី​ប៉ូលិស​បាន​ចាប់​ខ្លួន​ជន​សង្ស័យ​ទាំង​បី​រូប តែ​ដោះ​លែង​ជន​សង្ស័យ​ពីរ​រូប​ដែល​ជា​កូន​អ្នក​មាន​ឥទ្ធិពល​នៅ​ក្នុង​តំបន់។
ក្នុង​ឃ្លិប​វីដេអូ​រយៈពេល ១ នាទី ១៩ វិនាទី​ដែល​ថត​ដោយ​ម្ដាយ​នាង​ឈ្មោះ Tetyana Surovitska ជន​រង​គ្រោះ​រៀប​រាប់​ថា ពួកគេ​គួរ​តែ​ត្រូវ​កាត់​លិង្គ​ចោល និង​បោះ​ឲ្យ​ឆ្កែ​ស៊ី។
យោង​តាម​សារព័ត៌មាន​ក្នុង​ស្រុក The Hurriyet Daily News បាន​ឲ្យ​ដឹង​ថា ជន​សង្ស័យ​ពីរ​រូប​ដែល​ដោះ​លែង​មាន​ឈ្មោះ Maxim Prisyjnikov អាយុ ២៣ ឆ្នាំ ជា​កូន​ប្រុស​របស់​អភិបាល​ក្នុង​តំបន់​ម្នាក់ និង​ឈ្មោះ Artyon Pogosyan អាយុ ២១ ឆ្នាំ ជា​កូន​ប្រុស​រដ្ឋ​អាជ្ញា​ម្នាក់។
ករណី​ដ៏​គួរ​ឲ្យ​រន្ធត់​នេះ បាន​បង្ក​ឲ្យ​មាន​បាតុកម្ម​យ៉ាង​ធំ​ទូទាំង​អ៊ុយក្រែន និង​មាន​យុទ្ធនាការ​ស្ត្រី​ដោះ​អាវ​ប្រឆាំង​នឹង​ភាព​មិន​ស្អាត​ស្អំ​របស់​ ប៉ូលិស​ស៊ើបអង្កេត។ សមាជិក​សភា​មួយ​ចំនួន​បាន​អំពាវ​នាវ​ដល់​អ៊ុយក្រែន​ធ្វើ​ការ​កាត់​ទោស​ ប្រហារ​ជីវិត​ដល់​ជន​ជាប់​ចោទ និង​កាត់​លិង្គ​ពួកគេ។
ជន​រង​គ្រោះ​បាន​អះអាង​ថា នាង​ត្រូវ​បាន​ជន​សង្ស័យ Prisyjnikov និងPogosyan អញ្ជើញ​ទៅ​ផ្ទះ​មិត្ត​ភក្តិ​របស់​ពួកគេ​ឈ្មោះ Yevgeniy Krasnoshek ដែល​ទី​នោះ​ហើយ នាង​ត្រូវ​គេ​ចាប់​រំលោភ។ចំណែក​ក្រុម​សិទ្ធិ​ស្ត្រី Femen បាន​ធ្វើ​បាតុកម្ម​ដោះ​អាវ​នៅ​មុខ​អគារ​ការិយាល័យ​អគ្គ​ព្រះ​រដ្ឋ​អាជ្ញា​នៅ ​រដ្ឋ​ធានី Kyiv ដោយ​ស្រែក​ថា “សម្លាប់​ពួក​ដែល​សោយ​សុខ​លើ​គំនរ​ទុក​អ្នក​ដទៃ”។ បាតុកម្ម​ទាំង​នេះ​ញ៉ាំង​ឲ្យ​ប្រធានាធិបតី​អ៊ុយក្រែន Yanukovych បញ្ជា​ឲ្យ​អគ្គ​ព្រះ​រដ្ឋ​អាជ្ញា​ពិនិត្យ​មើល​ករណី​នេះ ហើយ​កាលពី​ថ្ងៃ​ទី ១៣ ខែ​មីនា បុរស​ទាំង​ពីរ​នាក់​ខាង​លើ​នោះ ត្រូវ​បាន​ចាប់​ខ្លួន​ឡើង​វិញ ដោយ​ជន​សង្ស័យ​ទាំង​បី​រូប ត្រូវ​ជាប់​ចោទ​ពី​បទ​មនុស្ស​ឃាត​ដោយ​គិត​ទុក​ជា​មុន៕