ខេត្តស្វាយរៀង ៖ កាស៊ីណូរ៉ូយ៉ាល់ បានបិទទា្វរផ្អាកដំណើរការ ថៅកែវេចលុយប្រុងរត់ បុគ្គលិកជាង១០០នាក់បណ្ដាក់គា្នយាម មាត់ទា្វរចេញ-ចូលជុំវិញកាស៊ីណូមិនឱ្យថៅកែចេញដោយទាមទារឱ្យបើកប្រាក់ខែពួកគេដែលជំពាក់ពីរខែមកហើយ។ ស្របពេលដែលកាស៊ីណូកំពុងតែកកើតដូចផ្សិតនៅលើទឹកដីខេត្ដសា្វយរៀងក៏មានកាស៊ីណូធំៗមួយចំនួនបានបិទទា្វរផ្អាកដំណើរការទៅវិញ។ ជាក់ស្ដែងកាលពីវេលាម៉ោង១២អធ្រាត្រឈានចូលថ្ងៃទី២២ ធ្នូ ២០១១ កាស៊ីណូរ៉ូយ៉ាល់ដែលមានទីតាំងនៅជាប់មាត់ច្រកទា្វរអន្ដរជាតិបាវិតបានបិទទា្វរផ្អាកដំណើរការ ដោយសារខាតទុនច្រើនពេក។
តំណាងបុគ្គលិកកាស៊ីណូបានឱ្យដឹងថា គ្រាន់តែផ្អាកដំណើរការភ្លាម ថៅកែកាស៊ីណូឈ្មោះហេ រិច ជនជាតិម៉ាឡេស៊ីបានប្រមូលយកលុយទាំងអស់ហាក់ដូចប្រុងរត់ទៅណាអញ្ចឹង។ សកម្មភាពនេះធ្វើឱ្យបុគ្គលិកទាំងអស់ចំនួន១៤៥នាក់ស្រី ៤៥នាក់ក្នុងនោះជនជាតិបរទេស៥នាក់ស្រីម្នាក់មានការព្រួយបារម្ភជាខ្លាំង ព្រោះថៅកែជំពាក់ប្រាក់ខែពួកគេ២ខែមកហើយមិនទាន់បើកឱ្យទេ គិតមកត្រឹមយប់ផ្អាកដំណើរការនេះ។ បុគ្គលិកកាស៊ីណូទាំងស្រីទាំងប្រុសបានបណ្ដាក់វេនគា្នយាមតាមមាត់ទា្វរចេញ-ចូលជុំវិញកាស៊ីណូទាំងកណ្តាលអធ្រាត្រ ព្រោះខ្លាចថៅកែរត់បាត់គ្មានអ្នកណាបើកប្រាក់ខែឱ្យ។ លុះរហូតមកដល់ម៉ោង១និង២០នាទីរសៀលថ្ងៃទី២២ ធ្នូ ថៅកែកាស៊ីណូបានសម្រុកចេញមកក្រៅបម្រុងរត់ តែត្រូវបុគ្គលិករារាំង ក៏មានការប្រទូស្តរ៉ាយគ្នាប្រមាណជា៣០នាទី ទើបកម្លាំងនគរបាលអធិការក្រុងបាវិតចុះទៅអន្ដរាគមន៍ហើយនាំថៅកែនោះចូលទៅក្នុងកាស៊ីណូវិញ។
ការប្រទូស្តរ៉ាយនេះពុំបណ្តាលឱ្យមានរបួសស្នាមទៅលើភាគីណាមួយនោះទេ ហើយក៏ពុំមានការឃាត់ខ្លួនបុគ្គលិកកាស៊ីណូណាម្នាក់នោះដែរ៕
No comments:
Post a Comment