វត្តឈើខ្មៅជាទួលសក្តិសិទ្ធិ និង ជាកន្លែងដែលទាក់ទាញភ្ញៀវទេសចរណ៍មកទស្សនាគ្រប់រដូវ
សម្លេងកាណូតបើកកាត់ផ្ទៃទឹកបង្កើតបានជារលកតូចៗរត់ប្រដេញគ្នាតាមដងស្ទឹងសង្កែឆ្ពោះទៅកាន់ភូមិកោះជីវាំង ឃុំព្រៃចាស់ស្រុកឯកភ្នំ ដែលមានចម្ងាយពីទីរួមខេត្តប្រមាណ ៥៤ គីទ្បូម៉ែត្រ ។ នៅចំពីមុខផ្លូវធ្វើដំណើរគេប្រទះឃើញវត្តបុរាណមួយហាក់ដូចជាប្រាសាទ
ផុសចេញពីក្នុងទឹក នៅកណ្តាលតំបន់ព្រៃរនាមបឹងទន្លេសាបនោះ គឺជាវត្តឈើខ្មៅដែលជាទួលសក្តិសីទ្ធិ ឬ ទួលអណ្តែតដែលសម្បូរដោយដើមឈើខ្មៅ វត្តនេះសាងសង់ទ្បើងនៅឆ្នាំ១៨៨៧ ហើយព្រះវិហារវត្តឈើខ្មៅធ្វើទ្បើងពីរុក្ខជាតិឈើខ្មៅសុទ្ធសាធ ។ វត្តនេះក៍ជាកន្លែងដែលទាក់ទាញភ្ញៀវទេសចរណ៍ជាតិ និង អន្តរជាតិមកទស្សនាគ្រប់រដូវកាលមុននឹងទៅទស្សនាជំរុំសត្វស្លាបទឹកព្រែកទាល់ ។
លោកទ្បុង ផុន ជំទប់ទី១ឃុំព្រៃចាស់បានបញ្ជាក់ថាវត្តឈើខ្មៅសាងសង់លើទួលមួយដែលពីដើមសម្បូរទៅដោយដើមឈើខ្មៅ ហើយគេបានកាប់ឈើនោះយកមកធ្វើព្រះវិហារ ទើបគេឱ្យឈ្មោះថាវត្តឈើខ្មៅ ។ កាលដើមទ្បើយទួលនេះគឺជាទួលសក្តិសិទ្ធិនៅក្នុងកណ្តាលតំបន់ព្រៃរនាមដៃបឹងទន្លេសាប ។
ទោះបីជាមានទឹកជំនន់ធំប៉ុណ្ណា ក៍ទួលដែលសាងសង់ព្រះវិហារនោះពុំដែលលិចទ្បើយ ។ ហេតុនេះទើបអ្នកស្រុកប្រសិទ្ធិនាមថា “ទួលអណ្តែត” ។ នៅរដូវប្រាំងព្រះវិហារនេះមើលទៅដូចជាប្រាសាទមួយស្ថិតនៅកណ្តាលព្រៃរនាម ហាក់ដូចជាអណ្តែតពីក្នុងផ្ទៃទឹកហើយនៅលើទួលនេះមានសល់ទូកងមួយធ្វើពីឈើគគីរដែលដុះនៅលើទួលនោះ ដែលគេកសាងទ្បើងតាំងពីពេលកកើតវត្តហើយមានបារមីខ្លាំងពូកែពេលប្រកួតម្តងៗមិនដែលចាញ់គេទេ។
លោកឈន លៀប មេឃុំព្រៃចាស់បានឱ្យដឹងថា វត្តខ្មៅមានអាយុកាល ១២៣ ឆ្នាំនេះ ពីអតីតកាលរហូតបច្ចុប្បន្នមានប្រជាពលរដ្ឋដែលរស់នៅតាមផ្ទះអណ្តែតទឹកស្ថិតក្នុងឃុំព្រៃចាស់ និង ឃុំកោះជីវាំង ស្រុកឯកភ្នំ តែងតែនាំគ្នាធ្វើបុណ្យគោរពបូជានិងនៅតែមានជំនឿលើបារមីរបស់ព្រះពុទ្ធរូបនៅក្នុងព្រះវិហារវត្តឈើខ្មៅឬទួលអណ្តែតនេះ។
ព្រឹទ្ធាចារ្យ ឈុំ អាយុ៧៨ឆ្នាំ ដែលរស់នៅឃុំព្រៃចាស់តាំងពីដើមមកបាននិយាយថា បើតាមឪពុកគាត់ដែលស្លាប់ទៅធ្លាប់ដំណាលថាកាលដើមទ្បើយនៅក្រោមព្រះវិហារ និង វត្តឈើខ្មៅមានសត្វនាគធ្វើរូងនៅពីក្រោមហើយក្នុងរដូវប្រាំង ឬ រដូវវស្សាទោះបីជាមានទឺកជំនន់ធំយ៉ាងណាក៍មិនដែលលិចវត្ត ឬ ព្រះវិហារវត្តឈើខ្មៅនេះដែរ ហើយវត្តនេះក៍មានបារមីពូកែសក្តិសិទ្ធិបើប្រជាពលរដ្ឋណាមានជួបទុក្ខលំបាកអ្វី ឬ ក៍មានបាត់ទ្រព្យសម្បត្តិអ្វីពេលមកបន់រួចបានរកឃើញដូចការប៉ងប្រាថ្នា ។ បច្ចុប្បន្ននេះជំនឿលើវត្តឈើខ្មៅបានសាបរលាបខ្លះៗហើយ។
ចំណែកលោកម៉ក់ ស៊ីនណារ៉ា អនុប្រធានមន្ទីរទេសចរណ៍ខេត្តបានបញ្ជាក់ថា មន្ទីរមានគម្រោងផែនការការពារព្រះវិហារវត្តឈើខ្មៅ និង សំណង់ចាស់ៗនៅក្នុងបរិវេណវត្តព្រមទាំងវត្ថុបុរាណដែលមាននៅក្នុងវត្តនេះ ។ ទន្ទឹមនេះមន្ទីរក៍មានគម្រោងធ្វើការជួសជុលព្រះវិហារទ្បើងវិញដោយរក្សាភាពដើម ជួសជុលសាលាបាលីកសាងអាងស្តុកទឹក និង ដាំដើមឈើទ្បើងវិញពិសេសដើមឈើធំៗហើយហាមជាដាច់ខាតការកាប់ដើមឈើព្រៃលិចទឹកដែលមាននៅតំបន់ជុំវិញវត្តដើម្បីថែរក្សាសោភ័ណភាពវត្តមួយនេះឱ្យនៅតែស្រស់បំព្រងក្នុងគោលបំណងទាក់ទាញភ្ញៀវទេសចរណ៍ជាតិនិងអន្តរជាតិឱ្យមកទស្សនាឱ្យបានច្រើន៕
No comments:
Post a Comment