ពីរ៉ាមីតនៃតំបន់ Giza ក្បែរទីក្រុង ខេរ៉ូ របស់អេហ្ស៊ីប ជាអច្ឆរិយវត្តុមួយក្នុងចំណោមអច្ឆរិយវត្ថុទាំងប្រាំពីររបស់ពិភពលោក មិនត្រឹមតែជាតំណាងនៃសមិទ្ធផលដ៏មហាអស្ចារ្យរបស់មនុស្សជាតិនោះទេ ក៏ប៉ុន្តែនេះ ក៏ជាប្រភពនៃអាថ៌កំបាំងផងដែរ។ កំពូលធំៗទាំងបីរបស់ ពីរ៉ាមីត ត្រូវបានគេធ្វើការសិក្សាជាច្រើនលើកច្រើនសា ពីសំណាក់អ្នកបុរាណវិទូជាតិអេហ្ស៊ីប ប៉ុន្តែដើមកំណើតដំបូងស្ថិតនៅក្នុងការទស្សន៍ទាយនៅឡើយ។ អ្វីដែលច្បាស់នោះគឺ
ថា ពីរ៉ាមីតត្រូវបានកសាងឡើងដោយព្រះអង្គ Pharaoh Khufu ហើយការសាងសង់នេះ ស្ថិតក្រោមការគ្រប់គ្រងដោយស្ថាបត្យករ
Hemiunu ជាប់សាច់សារលោហិតជាមួយព្រះអង្គរ Khufu ដែលបានចាប់ផ្ដើមកសាងប្រហែលក្នុងឆ្នាំ២៥៨០មុនគ.ស។ ពីរ៉ាមីត ហ៊ុមព័ទ្ធទៅ ដោយថ្មរលោងលើផ្ទៃខាងក្រៅ។ ប៉ុន្តែអ្វីដែលនៅសេសសល់ ក្នុងពេលបច្ចុប្បន្នគឺថ្មគ្រោងខាងក្នុងប៉ុណ្ណោះ។
សេចក្ដីសន្និដ្ឋាន ដែលអាចទទួលយកបានបំផុតមួយ អំពីការសាងសង់ពីរ៉ាមីត បានបង្ហាញថាការសាងសង់នេះ ធ្វើឡើងដោយការជីកយកថ្មពីក្នុងរណ្ដៅក្រោមដី ដោយប្រើកម្លាំងមនុស្ស និងសត្វលើក អូស ទាញទៅកន្លែងសាងសង់ ដែលចំណាយពេលប្រហែល២០ឆ្នាំ។ អ្នកវិទ្យាសាស្ត្រជឿជាក់ថា ឥដ្ឋថ្មកំបោរប្រមាណ២.៣លាន ដុំត្រូវបាននាំយកពីរណ្ដៅក្រោមដី ឬ ពីទន្លេនីល ឬត្រូវបានធ្វើនៅកន្លែងសាងសង់តែម្ដង។
អ្នកវិទ្យាសាស្ត្រជាច្រើន មិនអាចស្វែងយល់ច្បាស់ពីការបន្តុបថ្មលើគ្នារបស់ ពីរ៉ាមីតថា ត្រូវបានធ្វើឡើងយ៉ាងណានោះទេ ក៏ប៉ុន្តែពួកគេមួយចំនួនយល់ស្របថា គម្រោងសាងសង់ពីរ៉ាមីតត្រូវបានធ្វើឡើងដោយប្រុងប្រយ័ត្ន ដោយមានការច្របាច់បញ្ចូលគ្នារវាងស្ថាបត្យកម្មទំនើប និងធរណីមាត្រ។ អ្នកវិទ្យាសាស្ត្រទាំងនោះ បានយល់ស្របជាទូទៅថា មានកម្មករជំនាញៗ និងទាសករជាច្រើន ត្រូវបានប្រើក្នុងការសាងសង់នេះ។ ហេតុផលមិនច្បាស់លាស់ នៃការសាងសង់ពីបណ្ដាអ្នកវិទ្យាសាស្ត្រ និងអ្នកបុរាណវិទូមួយចំនួននោះ គឺមកពីមិនមានភស្តុតាងបុរាណវិទ្យា ឬប្រវត្តិសាស្ត្រគ្រប់គ្រាន់ ថាតើ វាត្រូវបានសាងសង់ឡើងយ៉ាងដូចម្ដេច។
យោងតាម អត្ថបទរបស់លោក Bob Brier ក្នុងទស្សនាវដ្ដីបុរាណវិទ្យាមួយ បានពិពណ៌នាអំពីអំណះអំណាងរបស់បញ្ញវន្តមួយចំនួនក្នុងពេលបច្ចុប្បន្ន អំពីការសាងសង់ ពីរ៉ាមីត។
អំណះអំណាងទីមួយគឺមានយានស្ទូច និង
ផ្លូវសម្ងាត់ ត្រូវបានធ្វើអំឡុងពេលសាងសង់គ្រឹះ។ យានស្ទូចត្រូវបានប្រើសម្រាប់ស្ទូចថ្មនៅកំពូលរបស់ពីរ៉ាមីត។ ប៉ុន្តែពួកគេពុំបានបញ្ជាក់ច្បាស់ថា តើយានស្ទូចនេះត្រូវបានប្រើនៅកន្លែងណានិងដូចម្ដេចនោះឡើយ។ អំណះអំណាងទីពីរបានបង្ហាញថា ផ្លូវសម្ងាត់ខាងក្នុងពីរ៉ាមីតត្រូវបានប្រើដើម្បីលើកថ្ម ទៅកាន់កំពូល ហើយផ្លូវសម្ងាត់នេះគឺបន្សល់ទុកនៅក្នុងពីរ៉ាមីតនៅឡើយ។ អំណះអំណាងនេះ ធ្វើការបង្ហាញដោយ លោក Jean-Pierre Houdin អ្នកវិទ្យាសាស្ត្រជនជាតិបារាំង ដែលបានបញ្ចេញនូវគំនិតនេះបន្ទាប់ពីការមានស្គែន (Microgravimetry) ខាងក្នុងប្រាសាទពីរ៉ាមីត។ ការស្គែននេះបានបង្ហាញថាពិតជាមានផ្លូវសម្ងាត់ក្នុងគ្រោងរបស់ពីរ៉ាមីតពិតប្រាកដមែន។
No comments:
Post a Comment