គ្មានជីវិតគូឯណា ដែលថាល្អគ្រប់យ៉ាង ឬមិនចេះឈ្លោះគ្នានោះទេ។ មនុស្សម្នាក់ៗតែងតែមានចំណុចល្អ ចំណុចអាក្រក់រៀងៗខ្លួន គ្រាន់តែថា តើអ្នកព្រមផ្លាស់ប្ដូរខ្លួនឯង ដើម្បីសម្របសម្រួលជាមួយដៃគូខ្លាំងកម្រិតណា? បើពីមួយថ្ងៃទៅមួយថ្ងៃចំណងស្នេហ៍របស់អ្នកចេះតែសោះកក្រោះបន្តិចម្ដងៗ ដោយសារតែការខ្វែងគំនិតយោបល់គ្នាច្រើនពេក អ្នកគួរតែសង្គ្រោះវាមកវិញ ដោយចាប់ផ្ដើមធ្វើរឿងសាមញ្ញៗ ៥ យ៉ាងខាងក្រោមនេះ៖
១.ឱប និងថើបគ្នាជារៀងរាល់ព្រឹក
អ្នកអាចគិតថា ប្រហែលជាមានតែគូស្នេហ៍ក្នុងរឿងភាគទេ ដែលអាចសម្ដែង Sweet Sweet បែបនេះបាន។ វាគឺជារឿងល្អខ្លាំងណាស់ ចុះហេតុអ្វីអ្នកមិនយកគំរូតាម? ផ្ដល់អារម្មណ៍រីករាយឲ្យគ្នាជាមួយការឱបយ៉ាងណែន និងស្នាមថើបដ៏ផ្អែមល្ហែមចេញពីបេះដូងពិតរបស់អ្នកជារៀងរាល់ព្រឹក នោះភាពស្និទ្ធស្នាលរវាងប្ដីប្រពន្ធនឹងវិលត្រឡប់មកវិញជាមិនខាន។
២.ជំនួសការផ្ញើសារ គួរនិយាយគ្នាផ្ទាល់ឲ្យបានច្រើន
នៅពេលខ្លួនមានអារម្មណ៍ធុញថប់ ឬមួម៉ៅដោយសាររឿងផ្សេងៗមនុស្សមួយចំនួនជ្រើសរើសយកការផ្ញើសារ ជាជាងការនិយាយផ្ទាល់ ព្រោះមិនចង់ជះកំហឹងដាក់គ្នាដោយអចេតនា។ ប៉ុន្តែកុំភ្លេចថា យូរៗទៅទំនាក់ទំនងអ្នកទាំងពីរនឹងកាន់តែឃ្លាតឆ្ងាយបន្តិចម្ដងៗ ព្រោះម្នាក់ៗលែងចង់និយាយស្ដីរកគ្នាច្រើនដូចមុន។
៣.ឈប់រអ៊ូរទាំ
ក្រោយពេលរស់នៅជាមួយគ្នាយូរឆ្នាំទៅ ម្នាក់ៗចាប់ផ្ដើមឃើញចំណុចខ្វះខាតរបស់ដៃគូច្រើនឡើង ហើយក៏ចេះតែមួម៉ៅ រអ៊ូរទាំ ដាក់គ្នាមិនឈប់ឈរ។ អ្នកមិនមែនជាឪពុកម្ដាយ ឬគ្រូបង្រៀនឡើយ ដូច្នេះអ្នកគួរតែឈប់ធ្វើរឿងបែបនេះទៀតទៅ ព្រោះវាបានត្រឹមតែនាំអពមង្គលចូលគ្រួសារប៉ុណ្ណោះ។
៤.សម្លឹងមើលមុខគ្នាឲ្យបានយូរ និងញឹកញាប់
ព្រោះតែម្នាក់ៗរវល់ជាមួយការងារ ដើម្បីដោះស្រាយបញ្ហាជីវភាពពេក អ្នកទាំងពីរពិតជាគ្មានពេលមកអង្គុយគយគន់សម្រស់គ្នាដូចពីមុនទេ។ ទឹកមុខរបស់ដៃគូបង្ហាញភាពមិនសប្បាយចិត្ត ធុញថប់ អស់កម្លាំង រំភើប ឬស្រស់ស្រាយ អ្នកមិនដែលចាប់អារម្មណ៍សោះ ព្រោះរាល់ពេលជួបមុខគ្នា អ្នកគ្រាន់តែក្រលៀសភ្នែកមួយភ្លែតៗចោលប៉ុណ្ណោះ។
៥.បន្ថយភាពជឿជាក់លើខ្លួនឯងខ្លះ
រៀបការរួច គាត់ក្លាយជាកម្មសិទ្ធិផ្ដាច់មុខរបស់អ្នក អ្នកប្រហែលគិតថា ទោះអ្នកធ្វើអ្វី ក៏គាត់មិនទៅណាចោលអ្នកដែរ។ អ្នកក៏ចាប់ផ្ដើមឈប់ខ្វល់ខ្វាយ ក្នុងការទាក់ទាញចំណាប់អារម្មណ៍របស់ដៃគូបន្តទៀត។ សូមកុំធ្វើបែបនេះ អ្នកគួររក្សាចិត្តពោះកញ្ជ្រោល ចង់បាន ខ្លាចបាត់បង់ ដែលធ្លាប់មានពីមុនចំពោះគាត់ឲ្យនៅតែដដែល នោះចំណងស្នេហ៍របស់អ្នកទាំងពីរនឹងគ្មានថ្ងៃរង្គោះរង្គើឡើយ៕
No comments:
Post a Comment